चंदगड, जि. कोल्हापूर ः चंदगड, आजरा विभागात काजू बोंडावर (Cashew Processing) प्रक्रिया उद्योग उभारण्यासाठी शासन सहकार्य करील, असे आश्वासन राज्य उत्पादन शुल्कमंत्री शंभूराज देसाई (Shambhuraj Desai) यांनी दिल्याची माहिती आमदार राजेश पाटील (Rajesh Patil) यांनी दिली.

मंत्रालयात मंत्री देसाई यांच्याबरोबर झालेल्या बैठकीत त्यांनी हे आश्वासन दिले. काजू (Cahew Liquor) बोंडापासून फेणी, वाइन आदी उपपदार्थ तयार करण्यासाठी शासनाने सिंधुदुर्ग व रत्नागिरी जिल्ह्यात परवानगी दिली आहे.

कोकणाला संलग्न चंदगड व आजरा तालुक्यातही काजूचे मोठे उत्पादन होते. येथील काजूची बोंडे अल्प प्रमाणात गोवा येथील प्रक्रिया उद्योजक खरेदी करतात. उर्वरित फळ शेतातच कुजून जाते.

त्यासाठी या विभागातही प्रक्रिया उद्योगाला परवानगी दिल्यास शेतकऱ्यांना लाभ होईल, अशी भूमिका आमदार पाटील यांनी मांडली. मंत्री देसाई यांनी यासंदर्भात शासन सकारात्मक निर्णय घेईल, असे आश्वासन दिले.

योगेश कदम यांच्यासह उत्पादन शुल्क विभागाचे प्रधान सचिव मिलिंद म्हैसकर, आयुक्त विजय सूर्यवंशी, उपसचिव युवराज अजेटराव, सहआयुक्त नितीन सावंत उपस्थित होते.