Bhor News : भाटघर धरण (Bhatghar Dam) प्रकल्पांतर्गत धरण भागातील भूतोंडे, नन्हे, बारे बु. आणि वाकांबे या पुनर्वसित गावठाणांतील नागरी सुविधांसाठी सुमारे २ कोटी ७० लाख ६४ हजारांचे सुधारित अंदाजपत्रकांना प्रशासकीय मान्यता देण्यात आली असल्याची माहिती आमदार संग्राम थोपटे यांनी दिली.

भाटघर प्रकल्पामुळे बाधित झालेल्या ४० गावठाणांतील १६२१.३९ लाख रुपये किमतीच्या १०९ नागरी सुविधा कामांना विभागीय आयुक्त यांच्या आदेशान्वये प्रशासकीय मान्यता प्रदान करण्यात आली आहे.

यामध्ये भोर तालुक्यातील भूतोंडे, नन्हे बारे बु. आणि वाकांबे या पुनर्वसित गावठाणांतील पाच नागरी सुविधा कामांचा समावेश होता.

या नागरी सुविधा कामांच्या जागा बदलल्यामुळे कामाच्या परिमाणात झालेली वाढ, दरसूचीतील वाढ आणि कर पद्धतीतील बदल या कारणांमुळे या कामांच्या सुधारित प्रशासकीय मान्यतेचा प्रस्ताव उपायुक्त (पुनर्वसन), विभागीय आयुक्त कार्यालय यांनी पत्रान्वये शासनास सादर केला आहे.

भाटघर प्रकल्पांतर्गत या पुनर्वसित गावठाणांमधील पाच नागरी सुविधा कामांच्या २ कोटी ७० लाख ६४ हजार ३५६ रुपये रकमेच्या अंदाजपत्रकास सुधारित प्रशासकीय मान्यता देण्यात आली आहे. यामध्ये भूतोंडे ग्रामपंचायत १० लाख ३१ हजार, नऱ्हे पोहोच रस्ता १ कोटी ४५ लाख, बारे बुद्रुक पोहोच रस्ता २३ लाख ७३ हजार, वाकांबे पोहोच रस्ता ८१ लाख ३० हजार, भूतोडे स्मशानभूमी १० लाख २० हजार मंजूर आहेत.

१९७६ पूर्वीच्या प्रकल्पाने बाधित पुनर्वसित गावांना नागरी सुविधा पुरविणे या संदर्भात शासनाने वेळोवेळी विहित केलेली धोरणे, मार्गदर्शक तत्त्वे आणि वित्तीय अधिकार मर्यादा तसेच निर्गमित करण्यात आलेले शासन निर्णय, अटी शर्ती आदी बाबींचे अनुपालन करण्याची दक्षता घ्यावी लागणार आहे.