Yavatmal News : शेतकऱ्‍यांच्या अडचणींचा फायदा घेत कृषी केंद्रातून बोगस खतांची विक्री करण्यात येत आहे. गेल्या दोन वर्षांत ‘केपीआर सिंगल सुपर फॉस्फेट’ खताचे पाच नमुने फेल झाले आहेत. त्यांच्या विक्रीवर बंदी घालत ५०० बॅगांचा साठा ‘होल्ड’ करण्यात आला आहे, असा दावा कृषी विभागाकडून करण्यात आला आहे.

गेल्या काही वर्षांपासून एकही हंगाम शेतकऱ्यांना साथ देत नाही. लागवड खर्चही निघत नसल्याने शेती सातत्याने तोट्यात जात आहे. त्यातच कृषी विक्रेते शेतकऱ्यांच्या माथी बोगस बियाणे व खते मारीत आहेत.

त्यामुळे शेतकऱ्यांच्या अडचणीत आणखीनच वाढ होत असल्याची ओरड केली जात आहे. खरीप हंगामाच्या तोंडावर बोगस बियाणे व खतविक्रेते सक्रिय झाले आहेत. शेतकऱ्यांना विविध प्रकारचे आमिष दाखवून विक्री केली जात आहे.

गेल्या वर्षी तीन व यंदा दोन, असे ‘केपीआर सिंगल सुपर फॉस्फेट कंपनी’च्या खतांचे पाच नमुने फेल निघाल्याने शेतकऱ्यांसह कृषी विभागात खळबळ उडाली आहे.

यंदा नमुन्यांचा अहवाल येण्यापूर्वी ‘केपीआर’ खतांची विक्री झाल्याची भीती व्यक्त होत आहे. कागदोपत्री वेगळे व प्रत्यक्षात वेगळेच चित्र असल्याचा आरोप शेतकऱ्यांकडून केला जात आहे. अशाप्रकारे अन्य कंपन्यांनीदेखील फायदा लाटल्याची शंका शेतकरी उपस्थित करीत आहे.