Akola News : सेंद्रिय शेतीला प्रोत्साहन देण्याच्या उद्देशाने राज्यातील चारही कृषी विद्यापिठांना स्वतंत्रपणे सेंद्रिय शेती संशोधन व प्रशिक्षण केंद्र देण्यात आले आहे. येथील डॉ. पंजाबराव देशमुख कृषी विद्यापीठात स्थापन या केंद्रामार्फत वेगवेगळे उपक्रम राबवले जात आहेत.

प्रामुख्याने या केंद्राअंतर्गत स्थापन केलेल्या प्रयोगशाळेत तयार झालेल्या जैविक निविष्ठांना शेतकऱ्यांचा मोठा प्रतिसाद मिळत आहे. गेल्या आर्थिक वर्षात या प्रयोगशाळेत तयार झालेल्या बायो पेस्टिसाईडची सुमारे १३ लाखांवर विक्री झाली आहे.

सेंद्रिय शेती संशोधन व प्रशिक्षण केंद्राचा ही प्रयोगशाळा एक भाग आहे. शेतकऱ्यांचा कल सेंद्रिय शेतीकडे वाढवण्यासाठी कृषी खात्याकडून जनजागृती केली जात आहे. राज्यात डॉ. पंजाबराव देशमुख जैविक मिशन स्थापन करण्यात आले आहे.

त्याला जोड म्हणून कृषी विद्यापिठांनाही या उपक्रमात सहभागी करून घेत संशोधनाचे काम सुरू झालेले आहे. येथील कृषी विद्यापीठात गेल्या तीन वर्षांपासून जैविक प्रयोगशाळा कार्यरत असून या प्रयोगशाळेत दर्जेदार निविष्ठा तयार केल्या जात असल्याने शेतकऱ्यांची मागणी वाढते आहे.

२०२०-२१ मध्ये या केंद्रात तयार झालेल्या निविष्ठांची चार लाख रुपयांची विक्री झाली होती. त्यानंतर २०२१-२२ मध्ये हा आकडा दुप्पट होऊन ६ लाख ३९ हजारांवर पोहोचला. तर या आर्थिक वर्षात विक्री दुप्पट होत १३ लाख २६ हजारांवर जाऊन पोहोचली.