Pune News : यादववाडी (ता. पुरंदर) येथे रूद्रगंगा नदीवर सुरू असलेल्या बंधाऱ्याच्या कामावर स्थानिक ग्रामस्थ व लाभार्थी शेतकऱ्यांनी आक्षेप घेतला आहे. बंधाऱ्याचे निकृष्ट दर्जाचे काम तातडीने थांबवण्याची मागणी केली असून, या कामाची चौकशी करून गुणवत्ता नियंत्रण विभागाकडून या कामाची पाहणी करण्याची मागणी शेतकऱ्यांनी केली आहे.

जिल्हा परिषदेच्या जिल्हा वार्षिक योजनेच्या माध्यमातून छोटे पाटबंधारे विभागांतर्गत ३५ लाख रुपये किमतीचा साठवण बंधारा बांधण्यात आला आहे. त्याच्या सिमेंट कॉंक्रीटचे काम २८ मे रोजी पूर्ण झाले होते. त्या कामावर पाणी साठवण्यासाठी करण्यात येणारी सिमेंट आळी दहा दिवस उलटले तरी अद्याप केली नसून, संपूर्ण बंधाऱ्याला तडे गेले आहेत.

स्थानिक ग्रामस्थ व लाभार्थी शेतकऱ्यांनी या कामाच्या ठेकेदाराला वारंवार सांगूनही त्या गोष्टीकडे जाणीवपूर्वक दुर्लक्ष केले असल्याचा आरोप शेतकऱ्यांनी केला आहे.

छोटे पाटबंधारे विभागाचे अधिकारी व ठेकेदार यांच्या संगनमताने या कामात काळाबाजार सुरू आहे. ओढ्याच्या खोलीपासून फक्त दोन फूट उंचीचा हा बंधारा तयार केला आहे.

त्यामुळे या बंधाऱ्याची पाणी साठवणक्षमता कमी झाली असून, शासनाने एवढा निधी खर्च करूनदेखील त्या बंधाऱ्याचा परिसरातील शेतकऱ्यांना फायदा होणार नसल्याचे शेतकऱ्यांनी सांगितले. यावेळी गुलाब थोपटे, प्रभाकर यादव, सतीश यादव, अमित यादव, नीलेश यादव, निखिल यादव, प्रशांत यादव आदी शेतकरी उपस्थित होते.