NCP Crisis :राष्ट्रवादी काॅंग्रेस पक्षात रविवारी (२ जून ) बंड झाले. या बंडानंतर पक्षात अजित पवार आणि शरद पवार असे दोन गट पडले. अजित पवार यांच्यासह राष्ट्रवादीच्या नऊ आमदारांनी मंत्रिपदाची शपथ घेतली. त्यानंतर अजित पवार गटाकडून वांद्रे येथील एमईटी इन्स्टिट्यूटमध्ये बुधवारी (ता. ५) बैठक आयोजित करण्यात आली होती.

या बैठकीत अजित पवार यांनी शरद पवार यांच्यावर सडकून टीका केली. अजित पवार यांनी थेट शरद पवार यांना अंगावर घेतल्यामुळे दोघांमधील राजकीय संघर्ष इथून पुढच्या काळच्या अधिक तीव्र होण्याचे संकेत मिळाले आहेत.

२०१४, २०१७ आणि २०१९ मध्ये भाजपबरोबर सत्ता स्थापन करण्याच्या प्रस्तावावर चर्चा सुरू होती. परंतु प्रत्येक वेळी शरद पवार यांनी अचानक माघार घेतल्यामुळे ते प्रयत्न फलद्रुप होऊ शकले नाहीत, असा आरोप अजित पवार यांनी केला. दरवेळेस आपल्याला खलनायक ठरवले गेले, असेही ते म्हणाले. राष्ट्रवादी काॅंग्रेस पक्षाच्या निर्मितीपासून पक्षाने अनेक भूमिका बदलल्या, अशी टीका त्यांनी केली.

देशाचा इतिहास पाहिला तर करिष्मा असलेला नेतृत्व लागतो. मोदीच्या करिष्म्यामुळे नऊ वर्षांपासून देशात भाजप सत्तेवर आहे. जर त्यांच्याशिवाय देशाला पर्याय नसेल तर आपण त्यांना पाठिंबा द्यायला काय हरकत आहे? मतदारसंघातील कामे करायची असतील तर भाजपसोबत जायला पाहिजे. अशी सर्वच राष्ट्रवादीच्या आमदारांची इच्छा होती. २०२२ मध्ये विधानसभेचे ५३ आणि ९ विधानपरिषदेचे आमदारांनी भाजपसोबत जाण्याबाबत शरद पवारांना पत्र दिले होते. पण त्यावेळी निर्णय न घेतल्याने एकनाथ शिंदे मुख्यमंत्री झाले, असा गौप्यस्फोट अजित पवारांनी केला.

अजित पवार म्हणाले, आज आपल्या पक्षातील अनेकांचे साखर कारखाने अडचणीत आहेत. जिल्हा बॅंका अडचणीत आहेत. त्या बाहेर काढायचे असेल, सत्तेत सहभागी राहिले पाहिजे. दिल्लीत विरोधकांची एकजूट होणे शक्य नाही. मग विरोधकांसोबत जाण्याचा हट्ट कशाला?, तुम्ही आता थांबलं पाहिजे, असे आवाहन अजित पवार यांनी केले.

यावेळी व्यासपीठावर प्रफुल्ल पटेल, सुनील तटकरे, छगन भुजबळ, दिलीप वळसे पाटील, हसन मुश्रीफ, धनंजय मुंडे, आदिती तटकरे, अनिल पाटील, रामराजे नाईक निंबाळकर, रुपाली चाकणकर, सुनील चव्हाण व आमदार उपस्थित होते. या बैठकीला राज्यभरातून पदाधिकारी आणि कार्यकर्त्यांनी गर्दी केली होती. सभागृहात अजित पवारांसोबत असल्याबाबतची प्रतिज्ञापत्रे घेण्यात आली. यावेळी प्रफुल्ल पटेल, सुनील तटकरे, छगन भुजबळ, धनंजय मुंडे व रुपाली चाकणकर यांची भाषणे झाली.