अॅग्रोवन वृत्तसेवा
सोलापूर : जिल्ह्यातील कुर्डुवाडी, अकलूज, दुधनी, अक्कलकोट, सांगोला आणि मोहोळ बाजार समित्यांच्या (Market Committee) संचालक मंडळांची निवडणूक प्रक्रिया सुरु झाली आहे.

सध्या प्रारूप मतदार यादी प्रसिद्ध करण्यात आली आहे. या यादीवर आता हरकती स्वीकारल्या जाणार आहेत. मतदार यादीवरील हरकतींवर सुनावणी झाल्यानंतर ७ डिसेंबरला या बाजार समित्यांची अंतिम मतदार यादी प्रसिद्ध केली जाईल. साधारणतः डिसेंबरमध्ये प्रत्यक्ष निवडणूक कार्यक्रम जाहीर होण्याची शक्‍यता आहे. सहकारी साखर कारखान्यांच्या निवडणूका आताच झाल्या आहेत. त्यानंतर आता बाजार समित्यांच्या निवडणुकांची रंगत रंगणार आहे.

जुन्या पद्धतीनेच मतदान
राज्य सरकारने बाजार समित्यांमध्ये शेतकऱ्यांना मतदानाचा अधिकार देण्याचा निर्णय मंत्रिमंडळाच्या बैठकीत घेतला आहे. परंतु पणन कायद्याच्या दुरुस्तीचे हे विधेयक वेळेत विधिमंडळात येऊ शकत नसल्याने या सहा बाजार समित्यांसाठी जुन्या पद्धतीने ग्रामपंचायत सदस्य व सोसायटीच्या सदस्यांतून मतदान होणार आहे, असे सांगण्यात आले.