Sangli Drought : सांगली जिल्ह्यात मागच्या चार महिन्यांपासून अत्यंत कमी पाऊस झाल्याने ऐन पावसाळ्यात जत तालुक्यात २५ गावात २३३ वाड्यांवर २९ टँकरने पाणी पुरवठा करण्याची वेळ आली आहे. याचबरोबर आटपाडी तालुक्यात ६ गावात, ३४ वाड्यांना ८ टँकरने पाणी पुरवठा सुरू आहे.

सप्टेबर महिन्यातच जिल्ह्यातील एकूण ३१ गावात व २६७ वाड्यांना एकूण ३७ टँकरने पाणी पुरवठा सुरू आहे. तसेच येत्या काही दिवसांत पाऊस न झाल्यास सांगली जिल्ह्यातील पूर्व भाग कोरडा पडण्याची भिती आहे.

सांगली जिल्ह्यातील पश्चिम भागातील वाळवा, शिराळा, तासगाव यासह अन्य तालुक्यात काही प्रमाणात पाऊस झाला. या भागात खरिपाच्या पेरण्या झाल्या परंतु या तालुक्यातीलही काही भागात पाऊस नसल्याने पेरण्या झाल्या नाहीत.

जूनपासून आज अखेर मिरज तालुक्यात २३४.७ मिलिमीटर पाऊस पडला. वाळव्यात २२९.५, ५९२, पलूसला ३६७.७, कडेगाव तालुक्यात १९८.१ मिमी पावसाची नोंद झाली आहे.

जत तालुक्यात केवळ २०६, खानापूर परिसरात १९९, तासगाव तालुक्यात ५५८.१०, आटपाडीत २१३.५ व कवठेमहांकाळ तालुक्यात २९९ मिमी पाऊस पडला. जिल्ह्यात चाऱ्याची टंचाई आहे. विहिरी, कूपनलिकांनी तळ गाठल्याने काही तालुक्यात पिण्याच्या पाण्यासाठी टँकर सुरू करण्याची वेळ आली आहे. तसेच जत तालुक्यातील २८, कवठेमहांकाळ तालुक्यातील १, आटपाडी तालुक्यात ३ आणि तासगाव तालुक्यातील २ अशा एकूण ३४ खासगी विहिरींचे अधिग्रहण केले आहे.

टँकर सुरू असणारी गावे

जिल्ह्यात जत तालुक्यातील निगडी खु., शेड्याळ, सिंदूर, पांढरेवाडी, वळसंग, एकुंडी, हळ्ळी, बसर्गी, सोन्याळ, सालेगिरी, पाच्छापूर, कुडनूर, वायफळ, गुगवाड, गिरगाव, संख, जाडरबोबलाद, काराजनगी, उमराणी, तिकोंडी, वेळोंडगी, मोकाशेवाडी, टोणेवाडी, माडग्याळ, सोनलगी, मुचंडी तसेच आटपाडी तालुक्यात आंबेवाडी, पुजारवाडी, पिंपरी खु., उंबरगाव, विठ्ठलापूर, पिंपरी बु. या गावात टँकरने पाणी पुरवठा सुरू आहे.