Nashik News : राज्यात विविध फळपिकांचा विस्तार होत आहे. बाजारपेठेतील मागणीनुसार प्रायोगिक तत्त्वावर लागवडी वाढत आहेत. त्याच अनुषंगाने व्हिएतनाम हे ड्रॅगन फ्रूट शेतीचे माहेरघर आहे. येथे फळ लागवड ते उत्पादन संबंधी शास्त्रीय माहिती घेण्याच्या उद्देशाने कसमादेतील शेतकऱ्यांनी व्हिएतनाम येथे अभ्यास दौरा करून तेथील ड्रॅगन फ्रूट शेतीची माहिती घेतली.

लागवड, पिकाची निगा, बाजारपेठ आदींची माहिती जाणून घेत आपल्या भागातही अशाच स्वरूपाच्या शेतीचा प्रयोग करण्याचा निर्धार या वेळी कसमादेतील शेतकऱ्यांनी व्यक्त केला. कसमादे परिसरातील शेतकरी प्रयोगशील आहेत.

डाळिंब, द्राक्ष, पेरू, आंबा, पपई, मोसंबी, ॲपल बोर, टरबूज, खरबूज, सीताफळ, अंजीर आदी फळांची शेती केली जाते. मात्र त्यात अडचणी आहेत. वेगळा प्रयोग म्हणून काही शेतकऱ्यांनी ड्रॅगन फ्रूटचा प्रयोग केला आहे. मात्र तो अपेक्षेप्रमाणे यशस्वी झाला नाही.

यामुळे त्यातील शास्त्रीय पद्धतीने कामकाज समजून घेण्यासाठी महाराष्ट्र डाळिंब उत्पादक संघाचे उपाध्यक्ष कृषीभूषण अरुण देवरे, पुणे येथील शास्त्रज्ञ डॉ. प्रकाश कुलकर्णी, ड्रॅगन फ्रूट असोसिएशनचे अध्यक्ष डॉ. मधुकर पोतदार आदींसह महाराष्ट्रातील २५ शेतकऱ्यांनी नुकताच व्हिएतनामचा दौरा केला.

दौऱ्यात होची मिंट या शहरापासून जवळच मोठ्या प्रमाणावर ड्रॅगन फ्रूटची शेती केली जाते. या वेळी शेतकऱ्यांनी रेड जम्बो ड्रॅगन शेतीची त्यांनी पाहणी केली. येथे लागवड बारा बाय आठ व दहा बाय आठ अशा अंतरावर करण्यात आली आहे.

ड्रॅगन फ्रूट शेती करताना ५ फुटी पोलचा वापर करण्यात आला असून ते एक फूट जमिनीत व चार फूट वरती आहे. रिंग किंवा चौकोनी फ्रेमऐवजी वरती चार गज काढलेले आहेत. एका बाजूला एक फांदी या प्रमाणे चार फांद्या पोलवर विरुद्ध दिशेने टाकलेल्या असतात.

दोघा बाजूंना दोन लॅटरल अशी या शेतीची रचना असते. या वेळी येथील शेतकऱ्यांनी या फळपिकांची व्हिएतनाम सरकारच्या शासकीय फलोत्पादन संशोधन संस्थेत माहिती जाणून घेतली. यात रोग, जाती, अडचणी, बाजारपेठ आदींची माहिती घेतली.

आठ दिवसांच्या या दौऱ्यात शेतकऱ्यांनी व्हिएतनामच्या विविध भागांना भेटी देऊन तेथील शेती व इतर माहिती जाणून घेतली. व्हिएतनाम दौऱ्यावर गेलेले शेतकरी ड्रॅगन फ्रूट शेतीबाबत शेतकऱ्यांमध्ये जनजागृती करणार आहेत.