वाशीम : खरीप हंगामात अतिवृष्टीमुळे (Kharif Season Heavy Rain) ज्या शेतकऱ्यांचे पीक नुकसान (Crop Damage) झाले आहे, अशा शेतकऱ्यांच्या तक्रारीवरून पीक नुकसानीचे सर्वेक्षण (Crop Damage Survey) करण्याचे काम संबंधित विमा कंपनी (Crop Insurance Company) आणि कृषी विभागामार्फत (Agriculture Department) करण्यात येत आहे. पीक नुकसानीचे सर्वेक्षण करण्यासाठी कोणत्याही प्रकारचे शुल्क आकारले जात नाही, नुकसानीचे सर्वेक्षण हे वस्तुनिष्ठ करण्यात येत आहे.

त्यामुळे पीक नुकसान नसताना चुकीने पीक नुकसान झाल्याचे दाखविण्यासाठी शेतकऱ्यांनी कंपनीच्या प्रतिनिधीला पैशाचे आमिष दाखवू नये. तसेच कंपनीचे प्रतिनिधी सुद्धा सर्वेक्षणासाठी कोणत्याही प्रकारचे शुल्क घेत नाही. त्यामुळे अफवांना बळी पडू नये, असे आवाहन कृषी विभागाने केले आहे.

सन २०२२-२३ या वर्षाच्या खरीप हंगामात जिल्ह्यातील २ लाख ७६ हजार शेतकऱ्यांनी प्रधानमंत्री पीक विमा योजनेत सहभाग घेतला आहे. ८३ हजार ७५० शेतकऱ्यांनी स्थानिक नैसर्गिक आपत्तीअंतर्गत पीक नुकसानीबाबत पूर्व सूचना दिल्या आहे. प्राप्त पीक नुकसानीच्या तक्रारीच्या अनुषंगाने ५० हजार ५७५ शेतकऱ्यांच्या तक्रारीनुसार पीक नुकसानीचे सर्वेक्षण करण्यात आले आहे. जिल्ह्यात सर्व तालुक्यांतून शेतकऱ्यांच्या सूचना प्राप्त अर्जाची संख्या जास्त आहे. त्यामुळे काही ठिकाणी काही शेतकरी माझे पीक नुकसानीचे सर्वेक्षण आधी करा, असा आग्रह पीकविमा कंपनीच्या सर्वेअरकडे करीत असल्याचे निदर्शनास आले आहे.

पीक नुकसान सूचना पत्राचे सर्वेक्षण विमा कंपनीचे प्रतिनिधी व कृषी विभागामार्फत नि:शुल्क करण्यात येत आहे. त्यामुळे शेतकऱ्यांनी भूलथापांना बळी न पडता कोणत्याही व्यक्तीस सर्वेक्षण शुल्क अथवा पैसे देऊ नये. याबाबत कुणीही पैशाची मागणी केल्यास संबंधित गावचे कृषी सहायक किंवा तालुका कृषी अधिकारी यांच्याशी संपर्क साधावा. आवश्यकता भासल्यास नजीकच्या पोलिस स्टेशनला तक्रार करावी, असे आवाहन जिल्हा अधीक्षक कृषी अधिकारी शंकर तोटावार यांनी केले आहे.