औरंगाबाद : मराठवाड्यातील सर्वात मोठा जायकवाडी प्रकल्प (Jayakwadi Dam) तुडुंब आहे. गुरुवारी (ता. २१) या प्रकल्पाच्या सर्व २७ दरवाजांतून गोदावरी नदीपात्रात (Godavari River) ८४,८८८ क्युसेकने विसर्ग सुरू करण्यात आला होता. त्यामुळे नदीकाठच्या गावांना सतर्कतेचा इशारा देण्यात आला आहे.

तुडुंब असलेल्या जायकवाडी प्रकल्पात १ जूनपासून २४३.३० टीएमसी पाण्याची आवक झाली. यापैकी १८७.४१ टीएमसी पाणी गोदावरीच्या नदीपात्रात सोडण्यात आले आहे. गुरुवारी सकाळी ६ वाजताच्या सुमारास जायकवाडी प्रकल्पात ६०९९४ क्युसेकने पाण्याची आवक सुरू होती.

त्याचवेळी प्रकल्पाच्या १० ते २७ क्रमांकाच्या १८ दरवाजांमधून ७५ हजार ४५६ क्यूसेकने पाण्याचा विसर्ग गोदावरीच्या नदीपात्रात सुरू होता. हे सर्व १८ दरवाजे जवळपास ४ फुटांनी उघडलेले होते.

दरम्यान, जायकवाडी प्रकल्पातून गुरुवारी सकाळी ९:४५ ते १० वाजेदरम्यान दरवाजा क्रमांक १ ते ९ असे एकूण ९ दरवाजे ०.५ फूट उंचीवर स्थिर करून ४७१६ क्युसेकने विसर्ग वाढविण्यात आला आहे. त्यामुळे नदीकाठच्या गावांनी सतर्क राहण्याची सूचना जायकवाडी प्रकल्पाच्या प्रशासनाने केली आहे.