Baramati News : बारामती तालुक्यातील कोळोली येथे जनावरांचा चारा व पाण्याची टंचाई निर्माण झाली आहे. त्यामुळे टंचाईच्या पार्श्वभूमीवर जनाई उपसा सिंचन योजनेचे आवर्तन सोडण्यात यावे, अशी मागणी उद्योजक प्रमोद खेत्रे व संदीप काटे यांनी केली आहे.

पाऊस लांबणीवर गेल्याने गावात आणि वाड्यावस्त्यावर पाणी टंचाई व जनावरांसाठी लागणाऱ्या चाऱ्याची तीव्र टंचाई जाणवत आहेत. पाण्याअभावी चारा पिके जळून गेली आहेत.

तर ९० टक्के ऊस जळण्याच्या मार्गावर आहेत. खरीप हंगामातील बाजरीचे पीक पाण्याअभावी हातचे गेले आहे. खरीप हंगामासाठी केलेला खर्च मोठ्या प्रमाणावर वाया गेला आहे. येत्या आठ - दहा दिवसांत पाऊस पडला तरच रब्बी हंगामातील पिके शेतकरी घेतली.

अन्यथा मोठ्या दुष्काळाचा सामाना यावर्षी करावा लागणार आहे. पाऊस नसल्यामुळे शेतमजुरांच्या हाताला काम नाही. त्यामुळे त्यांचे अतोनात हाल सुरू आहेत. शेतकऱ्यानी साठवलेला कांदा सडून जावू लागला आहे.

तसेच शेतकऱ्याचा शेतीपूरक असलेला दुग्धव्यवसाय पाण्याअभावी कोलमडू लागला आहे. त्यामुळे जनाई उपसा सिंचन योजनेचे आवर्तन तातडीने सोडावे, अशी मागणी येथील उद्योजक प्रमोद खेत्रे व संदीप काटे यांच्यासह शेतकऱ्यांकडून होत आहे.