Pune News : खरीप हंगामाची पुणे जिल्हा अधीक्षक कृषी कार्यालयाने तयारी सुरू केली असून, पुणे विभागामार्फत कृषी आयुक्तालयाकडे सुमारे ३३ हजार ३६५ क्विंटल बियाण्यांची मागणी केली आहे.

कृषी आयुक्तालयाकडून मंजुरी दिल्यानंतर बियाण्यांचा पुरवठा केला जाणार असल्याचे कृषी विभागाच्या सूत्रांनी सांगितले. पुणे जिल्ह्यात खरीप हंगामाचे सरासरी दोन लाख ७ हजार २५० हेक्टरवर पेरणी होण्याचा अंदाज कृषी विभागाने केला आहे.

मागील तीन ते चार वर्षांमध्ये खरीप हंगामात बियाण्यांची कमी-अधिक विक्री झाली आहे. सरासरी २८ हजार ५१५ क्विंटल बियाण्यांची विक्री झाली होती. गेल्या वर्षीही खरिपासाठी २९ हजार ५३० क्विंटल बियाण्यांची मागणी केली होती.

कृषी विभागाने मागणीमध्ये ३,८३५ क्विंटलने वाढ केली असून, जवळपास ३३ हजार ३६५ क्विंटल बियाण्यांची मागणी नोंदविली आहे. यामध्ये खासगी कंपन्यांकडून २५ हजार ८६५ क्विंटल, महाबीज व राष्ट्रीय बीज निगम विभागाकडून ७ हजार ५०० क्विंटल बियाण्यांचा पुरवठा अपेक्षित आहे.

खरीप हंगामासाठी मागणी केलेल्या बियाण्यांमध्ये संकरित ज्वारी, संकरित बाजरी, सुधारित बाजरी, भात, मका, तूर, मूग, उडीद, भुईमूग, तीळ, सूर्यफूल, सोयाबीन, वाटाणा, ताग आदी पिकांच्या बियाण्यांचा समावेश आहे.

तसेच, भाताचे १४ हजार ५०० क्विंटल बियाण्यांची मागणी नोंदविली आहे. त्यानंतर सोयाबीनच्या क्षेत्रात वाढ होण्याच्या दृष्टीने ९ हजार ५८१ क्विंटल बियाण्यांची मागणी केली आहे.

पीकनिहाय बियाण्यांची मागणी ः (क्विंटलमध्ये)

वाण --- बियाणे

भात --- १४,५००

संकरित बाजरी --- २३३७

मका --- २७३०

तूर --- १७८

मूग --- ३२६

उडीद --- ११३

सोयाबीन --- ९५८१

इतर पिके --- ३६००