Pune News : भीमाशंकर परिसरातील आदिवासी दुर्गम भाग असलेल्या फलोदे गावात ‘सकाळ’ रिलीफ फंड, शाश्वत संस्था मंचर, ग्रामपंचायत फलोदे व लोकसहभागातून लिंबोणीची वाडीतील विहिरीचे रुंदीकरण व खोलीकरण कामास शुक्रवारी (ता. २) प्रारंभ करण्यात आला.

आंबेगावच्या पश्चिम आदिवासी भागातील फलोदे येथे उन्हाळ्यातील काही महिने तीव्र पाणीटंचाई निर्माण होते. त्यामुळे महिलांना दूरवर जाऊन पाणी आणावे लागते. पाण्यासाठी महिलांची होणारी वणवण कायमस्वरूपी थांबावी.

या उद्देशाने येथील विहिरीचे रुंदीकरण व खोलीकरण काम करण्याबाबत मदत व्हावी यासाठी ग्रामपंचायतीने शाश्वत संस्था, मंचर व ‘सकाळ’ रिलीफ फंड, पुणे यांच्याकडे अर्ज सादर केला होता.

त्यानुसार ‘सकाळ’ रिलिफ फंड, शाश्वत संस्था, मंचर, ग्रामपंचायत पेसा निधी व लोकसहभागातून सदरच्या कामास मंजुरी मिळाल्याने शुक्रवारी (ता. २) कामाचा प्रारंभ करण्यात आला.

याप्रसंगी ग्लोबल नेचर फंड, जर्मनीचे थीस गीर्रट्झ, शाश्वत संस्था मंचरचे उपाध्यक्ष सुरेश राजवाडे, कोषाध्यक्ष अशोक आढाव, विश्वस्त प्रतिभा तांबे, सुलोचना गवारी तसेच सर्व पदाधिकारी व कार्यकर्ते तसेच फलोदे गावच्या सरपंच मनीषा मेमाणे, सदस्य दत्तात्रय मेमाणे, तान्हाजी मेमाणे, संजय मेमाणे, आशा मेमाणे, रोहिणी ठोकळ, नंदा हेमाडे, सीताबाई मेमाणे, कलावती मेमाणे, मनीषा मेमाणे, गौरी मेमाणे व ग्रामस्थ उपस्थित होते.