गोंदिया ः पूर्व विदर्भातील धान उत्पादकांची (Paddy Producer) बोनसची (Paddy Bonus) मागणी आहे. त्यासोबत परतीच्या पावसामुळे झालेल्या नुकसानीच्या (Paddy Crop Damage) भरपाईबाबत हिवाळी अधिवेशनात निर्णय घेण्यात येणार असल्याची माहिती कृषिमंत्री अब्दुल सत्तार (Abdul Sattar) यांनी दिली.

कृषिमंत्री सत्तार हे गोंदिया दौऱ्यावर असताना त्यांनी पत्रकारांशी संवाद साधला. सत्तार म्हणाले, की परतीच्या पावसामुळे राज्यात मोठ्या प्रमाणावर नुकसान झाले. त्याकरिता भरपाईचा निर्णय घेण्यात आला आहे. त्या संदर्भाने हिवाळी अधिवेशनात घोषणा होईल. धानाला बोनस देण्याचा प्रस्तावही विचाराधीन असून त्याविषयी देखील अधिवेशनात जाहीर केले जाणार आहे.

राज्यातील शेतकरी आत्महत्या थांबविण्यासाठी करावयाच्या उपाययोजनांबाबत सध्या दोन समित्या काम करीत आहेत. शेतकऱ्यांचे प्रश्‍न जवळून अनुभवता यावे याकरिता एक दिवस बळीराजासोबत ही योजना राज्यभर राबविली जात आहे.

या माध्यमातून शेतकरी आत्महत्या येत्या काळात थांबतील, असा विश्‍वास त्यांनी व्यक्‍त केला. त्याकरिता विदर्भातील शेतीवर विशेष फोकस केला जात आहे. शिवसेना नेते खासदार संजय राऊत यांना महाराष्ट्र-कर्नाटक सीमावादावरुन धमक्‍या येत असल्याबाबत विचारणा केली असता, अशा धमक्‍यांना महाराष्ट्र भीक घालत नाही.

मराठी माणसांच्या संरक्षणासाठी जो पुढे येईल, त्याच्यापाठीशी महाराष्ट्र राहील, असे ते म्हणाले. महाराष्ट्राबद्दलचे प्रेम मुख्यमंत्री एकनाथ शिंदे यांना शिकवू नये असा टोला ही त्यांनी यावेही लगावला.