तळोदा, जि. नंदुरबार : तालुक्यात ठिकठिकाणी परतीच्या पावसाने (Monsoon Return Rain) थैमान घातले असून, चिनोदा, रांझणी, प्रतापपूर, तळवे, मोरवड आदी गावांतील शेतकऱ्यांचे केळी, कापूस (Cotton Crop Damage), पपई, सोयाबीन (Soybean Crop Damage), उसाचे नुकसान झाले आहे. शेतकऱ्यांच्या हातातोंडाशी आलेला घास परतीचा पावसाने हिरावून नेल्याच्या भीतीने तळोदा शहरासह तालुक्यात गेल्या काही दिवसांपासून वातावरणात सातत्याने बदल होताना दिसून येत होता.

कधी पहाटे धुके, तर कधी दुपारी कडक उन्हाच्या तडाखा बसत होता. मात्र गेल्या दोन दिवसांपासून तळोदा शहराला व तालुक्याला परतीचा पावसाच्या जोरदार तडाखा बसला आहे. मंगळवारी (ता. ११) तब्बल एक तास मुसळधार पाऊस झाला तर बुधवारी (ता. १२)देखील पावसाने जोरदार हजेरी लावली.

पावसाच्या या तडाख्याने नगदी पिकांचे मोठे नुकसान झाले आहे. कापसाची बोंडे परिपक्व होऊन काही दिवसांवर कापूस वेचणीला येऊन ठेपला असताना, अचानक आलेल्या परतीच्या पावसाने कापसाची बोंडे गळून पडली आहेत. त्यामुळे कापूस उत्पादक शेतकऱ्यांचे मोठे नुकसान झाले आहे.

वादळी पावसामुळे अनेक शेतकऱ्यांच्या शेतातील केळीचे वृक्ष उन्मळून पडली आहेत. काढणीवर आलेल्या सोयाबीनला देखील मोठा फटका बसला आहे. शेत-शिवारात सध्या पाणी साचल्याने शिवारात जाणेही कठीण झाले आहे.

चिनोदा-प्रतापपूर रस्त्यावर झाडे उन्मळले

वादळी पावसामुळे चिनोदा ते प्रतापपूरदरम्यान रस्त्यावर ठिकठिकाणी झाडे उन्मळून पडली. त्यामुळे काही काळ रस्त्यावरील वाहतूक ठप्प झाली होती. या वेळी चिनोदा येथील शेतकरी गणेश मराठे व गावातील तरुणांनी पुढाकार घेत रस्त्यावरील झाडे बाजूला सारून रस्ता वाहतुकीसाठी मोकळा केला.