Innovative Farmer Award सोलापूर : केंद्रीय कृषी व शेतकरी कल्याण मंत्रालयाच्या वतीने भारतीय कृषी संशोधन परिषद (ICAR) व भारतीय कृषी संशोधन संस्थेतर्फे देण्यात येणारा ‘राष्ट्रीय नावीन्यपूर्ण शेतकरी पुरस्कार- २०२३’ महा ऑरगॅनिक ॲण्ड रेश्युड्युफ्री फार्मर्स असोसिएशनचे अध्यक्ष अंकुश पडवळे (Ankush Padwale) (मंगळवेढा, जि. सोलापूर) यांना जाहीर करण्यात आला आहे.

भारत सरकारच्या कृषी व शेतकरी कल्याण मंत्रालयातर्फे दर वर्षी हे पुरस्कार देशभरातील नावीन्यपूर्ण व शेतकऱ्यांना दिशादर्शक काम करणाऱ्या शेतकऱ्यांना देण्यात येतो. यापूर्वी ही पडवळे यांना केंद्र सरकार, राज्य सरकार व विविध स्वयंसेवी संस्थांकडून विविध पुरस्कार मिळाले आहेत.

पडवळे हे गटशेती, सेंद्रिय शेतीतून शेतकऱ्यांना सतत मार्गदर्शन व सहकार्य करीत असतात. तसेच शेतकऱ्यांचे अनेक प्रश्न ते केंद्र व राज्य सरकार यांच्याकडे अभ्यासपूर्ण मांडतात. त्यांच्या या कामाचीच दखल घेऊन केंद्र सरकारने त्यांना हा राष्ट्रीय कृषी पुरस्कार जाहीर केला आहे.

हा पुरस्कार पुसा संस्थेच्या मेळावा ग्राउंडवर २ ते ४ मार्च दरम्यान होणाऱ्या पुसा कृषी विज्ञान मेळाव्यात ४ मार्च रोजी केंद्रीय कृषिमंत्री नरेंद्रसिंह तोमर व केंद्रीय कृषी राज्यमंत्री कैलाश चौधरी यांच्या हस्ते देण्यात येईल. पडवळे यांना जाहीर झालेल्या राष्ट्रीय कृषी पुरस्काराबाबत त्यांचे सर्व स्तरातून अभिनंदन होत आहे.