Nashik Urea Racket : नाशिक जिल्ह्याच्या निफाड तालुक्यातील लासलगाव पोलीस ठाण्याच्या हद्दीत युरियाचा काळा बाजारप्रकरणी मोठी कारवाई करण्यात आली आहे. केंद्र सरकारने अनुदान जाहीर केलेल्या भारतीय जन उर्वरक परियोजना शिक्का असलेल्या युरियाच्या गोणी भरून नेत असताना ही कारवाई करण्यात आली आहे. नाशिक ग्रामीण स्थानिक गुन्हे शाखेच्या पथकाने आज (ता. २५) ही मोठी कारवाई केली.

याबाबत मिळालेल्या माहितीनुसार, मंगळवार पहाटे १ वाजेच्या सुमारास निफाड तालुक्यातील भरवस फाटा परिसरात छापा मारून काळ्या बाजारात विक्रीसाठी जाणारा २० लाख रुपये किंमतीचा युरिया खताचा मोठा साठा ताब्यात घेतला आहे.

निफाड तालुक्यातील लासलगाव पोलिस ठाण्याच्या हद्दीत असलेल्या भरवस फाटा नांदगाव रस्त्यावरील एका वस्तीवर ही कारवाई करण्यात आली. केंद्र शासन अनुदानित प्रधानमंत्री भारतीय जन उर्वरक परीयोजना शिक्का असलेल्या २० लाख रुपयांच्या ४०० ते ५०० गोण्यामधील युरिया खत दुसऱ्या खाजगी गोण्यामध्ये भरून नेण्यात येत होता.

मुंबईला घेऊन जाणारा एमएच १८ बीएच १७८६ हा ट्रक निफाडला स्थानिक गुन्हे शाखेच्या पथकाने पकडला. यामध्ये एका संशयितासह सदर ट्रकचा चालक व वाहक यांना पोलिसांनी ताब्यात घेतले असल्याची माहिती स्थानिक गुन्हे शाखेच्या पोलिसांनी माहिती दिली.

शेतकऱ्यांना मुबलक युरिया मिळावा म्हणून केंद्र सरकारने प्रधानमंत्री भारतीय जन उर्वरक परीयोजना चालू केली. या अंतर्गत शेतकऱ्यांना युरियाची गोणी २६० ते २८० रुपयांना मिळते.

युरिया तस्करांना ही गोणी २००० हजार रुपये दराने विकली जाते तर युरिया तस्कर ही गोणी मुंबईत ५००० रुपये प्रमाणे विक्री करतात अशी चर्चा आहे.