Farmers Dressed As a Bear : वन्य प्राण्यांचा अधिवास धोक्यात आल्यामुळे बऱ्याचदा वन्यप्राणी मानवी वस्त्यांकडे आपला मोर्चा वळवतात. अन्नाच्या शोधात फिरत वन्यप्राणी शेतातील उभ्या पिकांची नासाडी करतात.

रानडुकरे, जंगली माकडे यासारख्ये प्राणी शेती पिकांची मोठ्या प्रमाणात नासधुस करतात. जंगली प्राण्यांपासून पीकं वाचविण्यासाठी शेतकऱ्यांना दिवसरात्र शेतात खडा पहारा द्यावा लागतो.

कधीकधी तर रात्र शेतातील मचाणीवर जागून पिकांचे रक्षण करावे लागते. अशावेळी वन्य प्राण्यांकडून हल्ला होण्याची शेतकऱ्यांना भीतही असते. मात्र, जंगली माकडांपासून पिकांचे संरक्षण करण्यासाठी उत्तर प्रदेशमधील एका शेतकऱ्याने नामी शक्कल लढवली आहे.

शेतातील उभ्या पिकांचे माकडांपासून संरक्षण करण्यासाठी हा शेतकरी चक्क अस्वल बनून शेतात पहारा देत आहे. अस्वलाच्या वेशात शेतात फिरणाऱ्या या शेतकऱ्याचा व्हिडीओ सोशल मीडियावर तुफान व्हायरल झाला आहे.

उत्तर प्रदेशातील लखीमपूर खीरी जिल्ह्यातील शेतकऱ्याने माकडांपासून शेतातील पीक वाचविण्यासाठी अस्वलाचा वेश धारण केला आहे. अस्वलाचा वेश परिधान करून हा शेतकरी आपल्या शेताची रखवाली करत आहे.

ऐन उन्हाळ्याच्या दिवसांमध्ये हा शेतकरी अस्वलाचा वेश करून शेतात फिरताना दिसत आहे. लखीमपूर खीरी जिल्ह्यातील अनेक गावांमध्ये माकडांनी उच्छाद मांडला आहे. माकडांकडून शेती पिकांची मोठ्या प्रमाणात नासाडी करण्यासह लोकांवर हल्लेही केले जात आहे. यामुळे या गावांमधील शेतकरी त्रस्त झाले आहेत.

अस्वल बनून शेताची रखवाली

मैगलगंज येथील ढखौरा गावामध्ये माकडांनी अक्षरश: उच्छाद मांडला आहे. माकडांपासून पिके वाचविण्यासाठी रामनिवास या शेतकऱ्याने अस्वलाचे रूप धारण केले आहे. हा शेतकरी अस्वलाचा ड्रेस घालून आपल्या शेतात जातो आणि पिकांचे नुकसान करणाऱ्या माकडांना हाकलून लावत आहे.

ढखौरा गावासह जिल्ह्यातील अनेक गावांमध्ये माकडांच्या दहशतीमुळे शेतकरी संकटात सापडले आहेत. माकडांकडून ऊस, भाजीपाला, भुईमूग पिकांचे मोठ्या प्रमाणात नुकसान केले जात आहे.

अस्वल पाहून लोकही घाबरतात

शेतात अस्वलाच्या वेशात फिरणाऱ्या शेतकऱ्यांना पाहून माकडे पळून जातात. शेतकरी पाळी-पाळीने शेतात अस्वल बनून रखवाली करतात. ज्याला पाहून माकडे घारतात आणि पळून जातात. याशिवाय बाहेर गावांवरून येणारे लोकही शेतात फिरणारे अस्वल पाहून घाबरतात.

तेलंगाणातील शेतकऱ्यानेही केला होता प्रयोग

तेलंगणा राज्यातील सिद्दीपेट येथील एका शेतकऱ्यानेही असाच प्रयोग आपल्या शेतात केला होता. जंगली जनावरांपासून पिकांचे रक्षण करण्यासाठी या शेतकऱ्याने चक्क एका माणसालाच अस्वलच ड्रेस घालून कामाला ठेवले होते.

भास्कर रेड्डी या शेतकऱ्याने शेतातील पिकांचे रक्षण करण्यासाठी त्यावेळी एक अनोखी युक्ती केली होती. हा शेतकरी रोजंदारीवर ठेवलेल्या अस्वलाकडून आपल्या शेताची रखवाली करून घेत होता. यासाठी हा शेतकरी अस्वल झालेल्या माणसाला दिवसाला पाचशे रुपये पगारही द्यायचा.