अकोला  : कपाशी उत्पादक कंपन्यांकडून (Cotton Seed) पाकिटात साडेचारशे ग्रॅम बियाणे दिले जाते. त्यामुळे पॅकिंगचा खर्च (Seed Packaging Cost) वाढतो आणि शेतकऱ्यांनाही किंमत द्यावी लागते. परिणामी एक एकरासाठी कापूस बियाणे पॅकिंग असावे, अशी मागणी शेतकऱ्यांनी कृषी उपसंचालकांकडे केली.

बाळापूर तालुक्यातील मालवाडा येथे ‘एक दिवस बळीराजासाठी’ या उपक्रमाअंतर्गत कृषी उपसंचालक पांडुरंग शिगेदार यांनी भेट दिली. प्रयोगशील शेतकरी दिलीप ठाकरे, बाळापूर तालुका कृषी अधिकारी एन. डी. माने, मंडळ कृषी अधिकारी एस.डी. जाधव, कृषी सहाय्यक व्ही. आर. वसतकर उपस्थित होते.

पीकविमा कंपनीकडून मंडळनिहाय पावसाची नोंद घेतली जाते. त्यामध्ये अनेक अडचणी आहेत. पावसामुळे नुकसान झाल्यानंतर त्यांना भरपाई पासून वंचित राहावे लागते. रेन गेजची संख्या वाढविण्यात यावी अशी मागणी करण्यात आली. तर दिलीप ठाकरे म्हणाले, ‘‘शेतकऱ्यांनी यंदाच्या हंगामात कापसातील अनावश्यक कचरा कसा कमी करावा याकडे लक्ष द्यावे.

अनावश्यक घटक कापसात गेल्यास प्रक्रियेत अडचणी येतात. त्यामुळे वेचणी करताना दक्षता बाळगावी.’’ कार्यक्रमाला मुरलीधर टाले, विजय पाटील, नासिर खान, दिलीप डोंगरे, विलास जाधव, बंडूभाऊ गावंडे, विनायक वैराळे, राहत भाई, प्रकाश पारसकर, ज्ञानदेव रोहणकार, बंडूभाऊ भगत, गोपाल कराले, प्रवीण बोळे, कलीम भाई आदी शेतकरी उपस्थित होते.