Nashik News : मालेगाव, जि. नाशिक : नानाजी देशमुख कृषी संजीवनी प्रकल्पांतर्गत ठिबक सिंचनासाठी (Drip Irrigation) लाभार्थी म्हणून निवड झालेली झाली. त्यामुळे तक्रारदार व त्यांच्या भावाने शेतजमिनीवर फळबाग लागवड (Orchard Cultivation) करून ठिबक सिंचनाचे काम केले.

त्याच्या फाइलची तपासणी करून बिले ऑनलाइन अपलोड करण्यासाठी दोन हजार रुपयांची लाच घेताना कृषी पर्यवेक्षक सुधाकर विश्वनाथ सोनवणे यास लाचलुचपत प्रतिबंधक विभागाच्या पथकाने रंगेहाथ अटक केली.

कृषी पर्यवेक्षक सोनवणे यांच्याबद्दल ठिबक लाभार्थी तक्रारदाराने लाचलुचपत विभागाकडे तक्रार केली होती.

त्यानुसार लाचलुचपत विभागाच्या अधिक्षक शर्मिष्ठा घारगे-वालावलकर यांच्या मार्गदर्शनाखाली अपर पोलिस अधिक्षक नारायण न्याहळदे, पोलिस निरीक्षक साधना भोये- बेलगावकर व सहकाऱ्यांनी सापळा रचून कौळाणे (निं) (ता. मालेगाव) येथील बस थांब्याजवळ बंद टपरीसमोर लाच स्वीकारताना सुधाकर सोनवणे यास रंगेहाथ पकडण्यात आले.

मंगळवारी (ता. २१) ही कारवाई करण्यात आली. या प्रकरणी तालुका पोलिस ठाण्यात गुन्हा दाखल करण्यात आला आहे.