Solapur News : : कृषी मशागतीसाठी लागणारे पॅावर टिलरचे अनुदान मिळविण्यासाठी दाखल केलेल्या प्रकरणात करमाळ्यातील कृषी पर्यवेक्षक भारत मारुती शेंडे यांनी पडताळणी रिपोर्ट न जोडल्याने लाभार्थी लाभापासून वंचित राहिला होता. त्यास ते अनुदान मिळवून देण्यासाठी दहा हजार रुपयांची लाच स्वीकारताना शेंडे यांना सोलापूरच्या लाच लुचपत प्रतिबंधक विभागाने रंगेहाथ पकडले.

याबाबत माहिती अशी, की करमाळा येथील तक्रारदार यांनी त्यांचे शेतीच्या कामासाठी त्यांच्या पत्नीच्या नावे महाराष्ट्र शासनाच्या महा-डीबीटी या पोर्टलवर पॉवर टिलर खरेदीसाठी शासनाकडून मिळणारे अनुदानासाठी, ३० मे २३ रोजी ऑनलाइन अर्ज केला होता. त्यानंतर ऑनलाइन पद्धतीने सोडत होऊन तक्रारदार यांना पॉवर टिलर खरेदी करण्यासाठी पूर्वसंमती मिळाली होती.

त्यानुसार तक्रारदार यांनी पॉवर टिलर खरेदी करून त्याबाबतची सर्व कागदपत्रे ऑनलाइन अपलोड केली. त्यानंतर कृषी पर्यवेक्षक भारत शेंडे यांनी तक्रारदार यांचे पॉवर टिलरची पडताळणी करून खरेदीची सर्व कागदपत्रे तक्रारदार यांच्याकडून घेतली होती.

परंतु त्यांनी पडताळणी रिपोर्ट सबमिट न केल्याने तक्रारदार यांच्या पत्नीच्या बँक खात्यावर अनुदान जमा झाले नव्हते. त्यामुळे तक्रारदार यांनी शेंडे यांना संपर्क केला, त्यांनी तक्रारदार यांचे पडताळणी रिपोर्ट सबमिट करण्यासाठी १० हजार रुपये द्यावे लागतील, असे सांगून लाचेची मागणी केली.

त्यामुळे तक्रारदार यांनी त्यांच्याकडे होत असलेल्या लाच मागणीसंबंधी लाचलुचपत प्रतिबंधक विभागा, सोलापूर येथे तक्रार दिली. या तक्रारीच्या अनुषंगाने १५ सप्टेंबर रोजी तक्रारीची पडताळणी केली आणि सापळा रचून यातील संशयित आरोपी कृषी पर्यवेक्षक भारत शेंडे याला १० हजारांची लाच रक्कम स्वीकारताना रंगेहाथ पकडण्यात आले.