Akola News : मागील तीन ते चार दिवसांपासून या भागात पाऊस ओसरला आहे. यामुळे शेतीतील खोळंबलेली कामे जोमाने सुरू झाली आहेत. प्रामुख्याने सोयाबीन पिकात तणनाशक, कीडनाशकाची फवारणी, इतर पिकांना रासायनिक खतमात्रा देण्यासाठी लगबग सुरू आहे. सध्या युरिया या खताची टंचाई भासत असल्याने शेतकऱ्यांची दुसरीकडे पळापळही होत आहे. प्रशासनाकडून खत उपलब्धतेचे दावे होत असतानाही सहजपणे युरिया मिळणे दुर्लभ झाल्याची वस्तुस्थिती आहे.

जुलै महिन्यात शेवटच्या टप्प्यात काही तालुक्यांत जोरदार पाऊस झाला. दोनवेळा आलेल्या पावसाने शेती व पिकांचे नुकसान तर झालेच शिवाय ओलाव्यामुळे शेतीतील कामेही खोळंबली होती. आता पाऊस कमी झाल्याने शेतीतील कामांना वेग आला आहे. कुठे पिकात डवरणी केली जात आहे.

कुठे निंदणीची लगबग पाहायला मिळते. तर कुठे फवारणीचे काम जोमाने होत आहे. सोबतच पिकाला रासायनिक खताची दुसरी मात्रा देण्यालाही वेग आलेला आहे. शेतीच्या कामांसाठी मजुरांची मागणी वाढली आहे. बैलजोड्यांची दोन-दोन दिवसांची काही भागात वेटिंग आहे.

युरियाची चणचण

पिकांना दुसऱ्या खतमात्रेमध्ये बहुतांश शेतकरी युरिया देतात. मात्र, युरियाची सर्वत्र कमतरता बघायला मिळत आहे. जिल्ह्यात अकोट, तेल्हारा तालुक्यांत युरिया नसल्याची सर्वाधिक ओरड होत आहे. दुसरीकडे याच तालुक्यांना आतापर्यंत ५०० टन युरिया उपलब्ध करून दिल्याचा दावा जिल्हा प्रशासनाकडून होत आहे. शिवाय आणखी ३५० टन युरिया याच भागासाठी दिल्या जात आहे.

असे असतानाही काही ठिकाणी युरियाचा दरसुद्धा थोडाफार जास्त घेतला जात आहे. शिवाय ओळख असलेल्यांनाच हे खत सहज भेटत आहे. गेल्या आठवड्यात अकोटमध्ये युरियासाठी दुकानांसमोर मोठ्या रांगा लागल्याचे चित्र होते.

आता थोडी परिस्थिती सुधारली तरी सामान्य शेतकऱ्यांना युरिया भेटणे कठीण बनलेले आहे. बुलडाणा जिल्ह्यातही युरियाची कमतरता आहे. लवकर रॅक लागत नाही. लागलीच तर युरियासोबत इतर खतांची लिकिंग केली जात असल्याचे विक्रेत्यांकडून सांगितले जाते आहे. वाशीममध्येही युरियाबाबत काही ठिकाणी ओरड आहे.