Fake Seeds Fertilizers : खरीप हंगामाची सर्वत्र तयार सुरू आहे. हंगामाच्या तोंडावर बोगस बियाणे आणि निकृष्ट दर्जाची रासायनिक खते आणि कीटकनाशकांची विक्री होत असते. त्यामुळे शेतकऱ्यांचे मोठे नुकसान होत असते. या पार्श्वभूमीवर नागपूर कृषी विभागाने कृषी सेवा केंद्र तपासणी मोहीम सुरू केली. यामध्ये जिल्ह्यातील ५४ कृषी सेवा केंद्रावर धडक कारवाई करण्यात आली.

यामध्ये बोगस बियाणे, रासायनिक खते व कीटकनाशकांची विक्री करणाऱ्या २९ कृषी सेवा केंद्रांना विक्री बंद करण्याचे आदेश देण्यात आले तर २५ दुकानदारांचे परवाने निलंबित करण्यात आले आहे.

खरीप हंगामात मोठ्या प्रमाणात बोगस बियाणे, खत व कीटकनाशकांची विक्री होत असते. त्यामुळे कृषी विभाग,जिल्हा परिषदे कृषी विभागाच्या ४० गुणवत्ता नियंत्रण निरीक्षकांनी नागपूर जिल्ह्यात तपासणी मोहीम हाती घेतली होती. त्यासाठी जिल्हास्तरावर एक आणि तालुकास्तरावर १३ असे एकूण १४ भरारी पथक स्थापन करण्यात आले. या पथकामार्फत ३ बियाणे उत्पादक आणि ४३४ कृषि सेवा केंद्रांची आकस्मिक तपासणी केली.

तपासणी पथकाने धडक कारवाईदरम्यान ताब्यात घेतलेल्या बियाणांचे १४३, रासायनिक खतांची १३७ आणि कीटकनाशकांचे २५ नुमने तपासणीसाठी घेतले. ते प्रयोगशाळेत पाठवले. यापैकी खतांचे १३, बियाणे व कीटकनाशकाचा प्रत्येकी एक नमुना अप्रमाणित आढळून आले. गुणवत्ता नियंत्रण मानकांची पूर्तता न केल्याने एकूण २५ कृषी सेवा केंद्रांचे परवाने निलंबित करण्यात आले तसेच २९ कृषी सेवा केंद्राना विक्री बंद करण्याचे आदेश देण्यात आले आहेत.

बोगस बियाणे, रासायनिक खते व कीटकनाशकांच्या विक्रीबाबत शेतकऱ्यांची तक्रार असल्यास तक्रार निवारण कक्ष : संपर्क क्रमांक -८८३०२९०८८७ किवा टोल फ्री क्रमांक – १८००२३३४००० वर संपर्क साधावा, असे आवाहन जिल्हा अधीक्षक कृषी अधिकारी रवींद्र मनोहरे यांनी केले आहे.