Cows Died Due to Poisoning : कोल्हापूर जिल्ह्यातील कागल तालुक्यात एका शेतकऱ्याच्याबाबत धक्कादायक प्रकार घडला आहे. कागलमधील साके या गावात काही अज्ञातांनी शेतात असणाऱ्या वैरणीवर विषारी औषध फवारले होते.

दरम्यान ती वैरण रान मालकाने आपल्या गायींना घातली. ही विषारी वैरण गायींनी खाल्ल्यामुळे चार गायींचा गोठ्यात तडफडून मृत्यू झाला. यामुळे कागल परिसरात हळहळ व्यक्त केली जात आहे.

तानाजी सातापा गवसे व सुवर्णा तानाजी गवसे या शेतकरी कुंटुंबाने जीवापाड जपलेल्या गायींच्या मृत्यू झाला. यामुळे गावासह अख्या कुटूंबाला मोठा धक्का बसला आहे. या घटनेने सुमारे अडीच ते तीन लाखांचे नुकसान झाले आहे.

मिळालेल्या माहितीनुसार, कागल तालुक्यातील साके येथे चार दिवसांपूर्वी अज्ञातांकडून वीस गुंठ्यातील झेंडूफूल शेतीवर विषारी औषध फवारण्यात आले होते. यामुळे बाग करपून गेली होती.

दरम्यान ही घटना ताजी असताना दोन दिवसांपूर्वी येथील पैलवान तानाजी गवसे यांच्या कागल व्हनाळी रोडवर असणार्‍या भट्टाचा मळा नावाने ओळखल्या जाणाऱ्या शेतातील वैरणीवर अज्ञात व्यक्तीने वाईट हेतूने विषारी औषध फवारले.

दरम्यान याबाबत गवसे यांना औषध फवारणी केली असल्याची कल्पना नसल्याने त्यांनी नेहमीप्रमाणे ही वैरण आणून गवसे यांनी आपल्या गायींना घातली. गायींनी वैरण खाल्ल्यानंतर सुमारे तासाभराने चारही गायी तडफडू लागल्या. याबाबत गवसे यांना ही बाब लक्षात येताच त्यांनी त्वरीत डॉक्टरांना बोलावले.

जिल्हा परिषद व गोकुळच्या पशुवैद्यकीय अधिकाऱ्यांनी उपचार केले. पण उपचारा दरम्यान या गायींचा मृत्यू झाला. या घटनेने सर्व कुंटुंब हादरून गेले आहे. त्यातील एक गाय व वासरू दुसरा चारा घातल्यामुळे वाचले आहे.

साके येथील शेतकरी कुंटुंब आहे. शेती व जनावारांवर त्यांचा उदरनिर्वाह चालतो. तानाजी गवसे हे कुस्तीचे वस्ताद असून ते खेळाडू घडवत आहेत. त्यांची आर्थिक परिस्थिती बेताची आहे. या कुटुंबाला समाजातील दानशूर व्यक्तींनी आर्थिक मदत करावी, असे आवाहन युवा संघटनेचे अनिल पाटील यांनी केले आहे.