Pune Rain Update : गेल्या तीन दिवसांपासून धरणक्षेत्रात पावसाच्या जोरदार सरी कोसळत आहेत. त्यामुळे ओढे-नाल्यांच्या पाण्याच्या प्रवाहात वाढ झाल्याने धरणांतील पाणीसाठ्यात चांगलीच वाढ झाली आहे. आतापर्यंत जिल्ह्यातील २६ पैकी १२ धरणे शंभर टक्के भरली आहेत.

त्यामुळे आगामी काळातील शेतकऱ्यांचा शेतीचा आणि पिण्याच्या पाण्याचा प्रश्न काही प्रमाणात सुटण्यास मदत होणार आहे. वरसगाव, पानशेत, पवना, कासारसाई, कळमोडी, चासकमान, भामा आसखेड, आंध्रा, वडीवळे, डिंभे, भाटघर, निरा देवघर ही धरणे ओव्हरफ्लो झाली आहेत.

पुणे जिल्ह्यात बुधवारपासून (ता. २०) पावसास चांगली सुरुवात झाली. अनेक ठिकाणी पावसाच्या जोरदार सरी बरसत आहेत. सोमवारी (ता. २५) सकाळी आठ वाजेपर्यंत मुळशी धरणाच्या पाणलोट क्षेत्रात ३६ मिलिमीटर पाऊस पडला. घोड धरणाच्या पाणलोट क्षेत्रात २७ मिमी पाऊस पडला.

ठोकरवाडी, शिरोटा, वळवण, लोणावळा, कुंडली या घाटमाथ्यावर पावसाच्या तुरळक सरी पडल्या. तर टेमघर, पानशेत, खडकवासला, कळमोडी, चासकमान, आंध्रा, नाझरे, गुंजवणी, निरा देवघर, पिंपळगाव जोगे, माणिकडोह, येडगाव, वडज, डिंभे, चिल्हेवाडी, विसापूर या धरणक्षेत्रात तुरळक सरी पडल्या.

जिल्ह्यातील सर्व धरणांत मिळून मागील चोवीस तासांमध्ये एकूण २.४५ टीएमसी एवढ्या पाण्याची आवक झाली आहे. त्याअगोदर रविवारी (ता. २४) चोवीस तासांमध्ये २.३३ टीएमसी, शनिवारी २.०७ टीएमसी, गुरुवारी १.६० टीएमसी एवढ्या पाण्याची आवक झाली होती. त्यामुळे धरणांतील पाणीसाठा वाढण्यास मदत झाल्याने ही धरणे शंभर टक्के भरली आहेत.

जिल्ह्यातील सर्व धरणांची मिळून पाणीसाठवण क्षमता एकूण १९८.३४ टीएमसी आहे. आतापर्यंत १४२.१२ टीएमसी म्हणजेच ७१ टक्के पाणीसाठा झाला आहे. गेल्या वर्षी याच काळात या धरणात २००.४५ टीएमसी म्हणजेच १०१ टक्के पाणीसाठा झाला होता. गेल्या वर्षीच्या तुलनेत यंदा पाणीसाठा कमी झाला असला तरी पावसाचे प्रमाणही कमी राहिले असल्याचे चित्र आहे.

मुठा खोऱ्यातील टेमघर, वरसगाव, पानशेत, खडकवासला या चारही धरणांत पावसाचे प्रमाण कमी होते. त्यामुळे ०.३४ टीएमसी एवढ्या पाण्याची आवक मागील चोवीस तासांमध्ये झाली आहे. निरा खोऱ्यातील धरणक्षेत्रातही पाऊस कमीच होता.

त्यामुळे पवना, कासारसाई, कळमोडी, चासकमान, भामा आसखेड, आंध्रा, वडीवळे, शेटफळ, नाझरे, गुंजवणी, भाटघर, निरा देवघर, वीर या धरणांत एकूण ०.५२ टीएमसी एवढेच पाणी दाखल झाले. कुकडी खोऱ्यातील पिंपळगाव जोगे, माणिकडोह, येडगाव, वडज, डिंभे, चिल्हेवाडी, घोड धरणांतही कमीअधिक पाऊस होता. त्यामुळे धरणांत नव्याने ०.६३ टीएमसी एवढेच पाणी आले आहे.