Solapur News : राज्य उत्पादन शुल्क विभागाने शनिवारी (ता. १२) जिल्ह्यातील हातभट्टी दारू तयार करणाऱ्या तांड्यांवर छापे टाकले. ११ गुन्ह्यांमध्ये १३० लिटर हातभट्टीसह १० हजार ९९० लिटर गुळमिश्रित रसायन जप्त करून जागीच नष्ट केले.

संपूर्ण राज्यभरात राज्य उत्पादन शुल्क विभागाचे आयुक्त डॉ. विजय सूर्यवंशी यांनी ‘हातभट्टीमुक्त गाव’ अभियानाचा संकल्प केला आहे. त्या अनुषंगाने सोलापूर विभागाने शनिवारी जिल्हाभर विशेष मोहीम राबविली.

या मोहिमेअंतर्गत सोलापूर विभागाचे अ विभाग, ब विभाग, भरारी पथक व सीमा तपासणी नाक्याच्या पथकांनी उत्तर सोलापूर तालुक्यातील घोडा तांडा, कवठे तांडा, भोजप्पा तांडा व शिवाजीनगर तांडा या ठिकाणी सकाळच्या सुमारास धाडी टाकल्या.

या धाडीत एकूण आठ गुन्ह्यात १०० लिटर हातभट्टी दारू व नऊ ६०० लिटर रसायन, असा एकूण दोन लाख ४४ हजार २०० रुपयांचा मुद्देमाल जप्त करण्यात आला.

ही कारवाई निरीक्षक सदानंद मस्करे, राहुल बांगर, दुय्यम निरीक्षक अक्षय भरते, उषाकिरण मिसाळ, मानसी वाघ, सुरेश झगडे, कृष्णा सुळे, मयुरा खेत्री, राजेंद्र वाकडे, सचिन गुठे, मुकेश चव्हाणयांच्या पथकाने केली.‌