Parbhani News : परभणी व हिंगोली जिल्ह्यांमध्ये लम्पी स्कीन आजाराच्या सक्रिय पशुरुग्णांच्या संख्येत मागील पंधरा दिवसात ६७८ ने वाढ झाली आहे. गुरुवार (ता. २४) पर्यंत या दोन जिल्ह्यांतील लम्पी स्कीन आजाराचे १ हजार ३५१ पशुरुग्ण होते.

यंदा एप्रिलपासून आजवर या दोन जिल्ह्यांतील ३ हजार ४५३ जनावरांना लम्पी स्कीन आजाराचा प्रादुर्भाव झाला. उपचारानंतर १ हजार ६२२ जनावरे बरी झाली आहेत. परंतु गंभीर असलेली ४८० जनावरे दगावली आहेत, अशी माहिती जिल्हा पशुसंवर्धन विभागाच्या सूत्रांनी दिली.

परभणी जिल्ह्यात बुधवारी (ता. ९) लम्पी स्कीन आजाराचे ३७३ सक्रिय पशुरुग्ण होते. मागील पंधरा दिवसांत त्यात ५१९ पशुरुग्णांची भर पडून गुरुवारी (ता. २४) एकूण ८९२ सक्रिय पशुरुग्ण होते. त्यापैकी ३६ पशुरुग्ण गंभीर आहेत. जिल्ह्यात गायी, बैल, म्हैस मिळून एकूण ३ लाख ९८ हजार ३५६ पशुधन होते. यंदा १ एप्रिलपासून आजवर लम्पी स्कीन आजारामुळे १ हजार ८६४ जनावरांमुळे बाधित झाली आहेत.

त्यात ८४५ गायी, १ हजार १९ बैलांचा समावेश आहे. उपचारानंतर ५९८ जनावरे बरी झाली आहेत त्यात २५४ गायी व ३४४ बैलांचा समावेश आहे. यंदा आजवर ३७४ जनावरे दगावली आहेत. त्यात ४८ गायी, ९२ बैल, २३४ वासरे आहेत.आजवर २ लाख ६५ हजार २५४ जनावरांचे लसीकरण करण्यात आले. प्रादुर्भाव रोखण्यासाठी जिल्ह्यातील पशुधनास लसीची दुसरी मात्रा दिली जात आहे.

वासरांमध्ये या आजाराचा प्रादुर्भाव अधिक होत आहे. या आजाराचा प्रसार रोखण्यासाठी पशुपालकांमध्ये जनजागृती केली जात आहे, असे जिल्हा पशुसंवर्धन उपायुक्त डॉ. पी. पी. नेमाडे यांनी सांगितले. हिंगोली जिल्ह्या यंदा १ एप्रिलपासून २३५ गावांतील १ हजार ५८९ जनावरांना लम्पी स्कीन आजाराचा प्रादुर्भाव झाला आहे.

सध्या ४५९ सक्रिय पशुरुग्ण आहेत. उपचारानंतर एकूण १ हजार २४ जनावरे बरी झाली आहेत. आजवर १०६ जनावरे दगावली आहेत. यंदा २ लाख ३२ हजार २०० लसमात्रा प्राप्त झाल्या. एकूण २ लाख २६ हजार २४२ जनावरांचे लसीकरण करण्यात आले, असे सूत्रांनी सांगितले.