Beed Water Scarcity : बीडमधील माजलगावसह तीन धरणात शून्य टक्के पाणीसाठा

Pune News : राज्यात एकीकडे उष्णतेच्या लाटेने सर्वसामान्यांना हैराण केले असतानाच दुसरीकडे अवकाळी पावसाने शेतकऱ्यांच्या तोंडचे पाणी पळवले आहे. यादरम्यान मराठवाड्यातील अनेक जिल्ह्यात मात्र सर्वसामान्यांसह जनावरांच्या पिण्याच्या पाण्याचे दुर्भिक्ष निर्माण झाले आहे. मराठवाड्यातील बीडमध्ये देखील सध्या दुष्काळाची स्थिती निर्माण झाली आहे. जिल्ह्यातील ८ छोट्या मोठ्या धरणात उपयुक्त पाणीसाठा जेमतेम शिल्लक राहिला आहे. जिल्ह्यातील माजलगावसह तीन धरणांमध्ये पाणीसाठा शून्य टक्के आहे. यामुळे जिल्ह्यात पिण्याच्या पाण्याची टंचाई निर्माण झाली आहे.

गेल्या वर्षी पावसाने हुलकावणी दिल्याने यंदा राज्यातील ४० तालुके आणि १,१०० हून अधिक मंडलांत सरकारला दुष्काळ जाहीर करावा लागला आहे. तर सध्या राज्यातील १,८३४ गावे आणि ४,४३४ वाड्यांवर २३२० टँकरद्वारे पाणीपुरवठा केला जात आहे. यात सर्वाधिक टँकर मराठवाड्यातील छ. संभाजीनगर यानंतर जालना आणि त्यानंतर बीड जिल्ह्यात लागत आहेत.

पाणी पुरवठा विभागाने दिलेल्या माहितीनुसार बीड जिल्ह्यातील १६२ गावे १२६ वाड्यावस्त्यांवर १९९ टँकरने पाणीपुरवठा केला जात आहे. तर संभाव्य टंचाई विचारात घेत पशुसंवर्धन विभागाच्या आदेशाप्रमाणे जिल्ह्यात चारा बियाण्यांचे वाटप करण्यात आले होते. यामुळे अद्याप येथे जनावरांच्या चाऱ्याचा प्रश्न निर्माण झालेला नाही, असे प्रशासनाचे म्हणणे आहे.

तर जिल्ह्यातील चाऱ्याचा प्रश्न मार्गी लागावा म्हणून याआधीच प्रशासनाने चारा बंदी केली आहे. तसेच महावितरणशी बोलून अवैध्य कृषी पंपांवर कारवाई केली जात असल्याचे प्रशासनाने म्हटले आहे. तर जिल्ह्यात यंदा ज्वारीचे पीक चांगले झाले असून कडबा भरपूर आहे. यामुळे जिल्ह्यात कोठेच चाऱ्याचा प्रश्न निर्माण झालेला नाही असेही प्रशासनाने म्हटले आहे.

मात्र जिल्ह्यात पाणीटंचाई आणि वाढत्या उन्हाच्या झळांमध्ये म्हणावे तसे चाऱ्याचे उत्पादन झालेले नाही. यामुळे चाराटंचाईची भीषण समस्या भासू लागली आहे. प्रशासनाने शेतकऱ्यांच्या पशुधनाचा विचार करताना जिल्ह्यात चारा छावण्या सुरू कराव्यात अशी मागणी शेतकऱ्यांनी केली आहे.