Nashik ZP : नाशिकमध्ये जिल्हा परिषदेचे आता ७४ गट

Nashik News : तब्बल साडेतीन वर्षांपासून प्रतीक्षेत असलेला जिल्हा परिषदेच्या गट व पंचायत समितीच्या गणरचनेचा प्रारूप आराखडा सोमवारी (ता.१४) अखेर प्रसिद्ध करण्यात आला. नव्या आराखड्यानुसार जिल्हा परिषद गटांची संख्या आता ७४ झाली असून, गणांची संख्या १४८ वर पोहोचली आहे.

विशेषतः मालेगाव, चांदवड आणि सुरगाणा या तालुक्यांत प्रत्येकी १ गट वाढला आहे, तर निफाड तालुक्यात २ गट कमी करण्यात आले आहेत. साडेतीन वर्षांनंतर जिल्हा परिषद व पंचायत समित्यांची निवडणूक होत असल्याने इच्छुकांचे लक्ष आता गट आरक्षणाकडे लागले आहे. आरक्षण जाहीर झाल्यानंतरच निवडणुकीची खरी रणधुमाळी सुरू होणार आहे.

गट व गणरचनेवरील हरकती २१ जुलैपर्यंत जिल्हाधिकाऱ्यांकडे सादर करता येणार आहेत.त्या अनुषंगाने अंतिम आराखडा १८ ऑगस्टपूर्वी प्रसिद्ध होणार आहे.जलज शर्मा जिल्हाधिकारी यांच्या सूचनेनुसार तालुकास्तरीय समित्यांकडून प्राप्त झालेल्या आराखड्यांची तपासणी करून प्रारूप आराखड्याला मंजुरी देण्यात आली.

गटांचे क्रमांक,लोकसंख्या,नकाशाची दिशा यासारख्या तांत्रिक बाबींची बारकाईने पाहणी करण्यात आली होती. प्रारूप आराखड्याच्या प्रती तहसील कार्यालये,पंचायत समित्या,जिल्हा परिषद आणि जिल्हाधिकारी कार्यालय येथे उपलब्ध करून देण्यात आल्या आहेत.

बदल, प्रभाग पुनर्रचना

२०१७ च्या निवडणुकीतील रचनेनुसार जिल्ह्यातील तालुक्यांत गट व गणांची रचना कायम ठेवण्यात आली आहे. मात्र, चांदवड, मालेगाव आणि सुरगाणा या तालुक्यांमध्ये प्रत्येकी १ गट वाढवण्यात आला आहे.निफाड तालुक्यातील २ गट वगळण्यात आले असून त्यानुसार पुढील फेरबदल झाले आहेत.

पिंपळगाव गटातील अंतरवेल, मुखेड ही गावे पालखेड गटात, बेहेड,नारायण टेंभी, उंबरेखड ही गावे कसबे सुकेणे गटात, पालखेड गटातील कुंदेवाडी गाव उगाव गटात तर सुकेणे गटातील नारायणगाव चांदोरी गटात समाविष्ट करण्यात आले आहे.

प्रभागरचनेचा कालबद्ध कार्यक्रम

२१ जुलै : हरकती व सूचना जिल्हाधिकाऱ्यांकडे सादर करण्याची अंतिम तारीख

२८ जुलै : जिल्हाधिकाऱ्यांकडून विभागीय आयुक्तांना प्रस्ताव सादर

११ ऑगस्ट : हरकतीवर सुनावणी घेऊन निर्णय

१८ ऑगस्ट : निवडणूक आयोग किंवा अधिकृत अधिकारी अंतिम प्रभाग रचना मंजुरीसाठी सादर करतील