Agriculture Solar Pump : सोलरही नाही अन् पैसेही परत मिळेना

Chh. Sambhajinagar News : मागेल त्याला सोलर योजनेत ऑनलाइन अर्ज भरताना गट नंबर चुकला. त्यामुळे सोलर मिळण्यातून नंबर हुकला. पण त्या सोलरसाठी भरलेले पैसे परत मिळेना. शिवाय दुसरा अर्ज करावा तर तोही स्वीकारला जाईना त्यामुळे सिंचनासाठी सोलार कृषी पंपाची गरज असूनही तो मिळण्यासाठी करावे काय असा प्रश्‍न फुलंब्री तालुक्यातील लोहगड नांद्रा येथील शेतकऱ्यांसमोर उभा ठाकला आहे.

या संदर्भात अधिक माहितीनुसार, की लोहगड नांद्रा (ता. फुलंब्री) येथील खेमचंद मोतीराम राठोड यांनी मागेल त्याला सोलार योजनेअंतर्गत अर्ज सादर केला होता. त्यासाठी २२ नोव्हेंबर २०२४ रोजी २२ हजार ९७१ रुपये भरले होते. त्यानंतर त्यांचा अर्ज गट नंबर चुकल्याने बाद झाल्याचे त्यांना कळले.

त्यांचा लाभार्थी क्रमांक Mk४४१३६०००१०५२२ हा आहे. ऑनलाइन अर्ज करताना चुकून गट नंबर २१५ झाला, प्रत्यक्षात आपला गट नंबर २०९ आहे पण तो चुकल्याने आपला अर्ज बाद झाल्याचे आपल्याला कळल्याचे श्री. राठोड म्हणाले.

चुकलेला गट नंबर दुरुस्त करण्यासाठी प्रयत्न केले तर तोही होईना. त्यामुळे अर्ज बाद झाल्याने भरलेली रक्कम परत मिळावी यासाठी महावितरणच्या अधीक्षक अभियंता यांना मे महिन्यातच पत्र दिले. त्या पत्रात आपली भरलेली रक्कम जातेगाव येथील जिल्हा मध्यवर्ती शाखेच्या खात्यावर भरती करण्याची विनंती त्यांनी केली होती.

परंतु अजूनही भरलेली रक्कम त्यांना परत मिळाली नसल्याचे त्यांचे म्हणणे आहे. सोलार पंप मिळावे म्हणून गट नंबरमध्ये दुरुस्ती होत नाही. शिवाय सोलरसाठी पुन्हा अर्ज करावा तर पैशाचा प्रश्‍न आहेच.

एवढे करूनही आपण पुन्हा पैशाची जुळवाजुळव करून सेतूवर पुन्हा सोलरसाठी नव्याने अर्ज करायला गेलो. तुमचा अर्ज आधीच केलेला आहे, त्यामुळे तो पुन्हा स्वीकारला जात नाही असे दाखवते. त्यामुळे इच्छा व गरज असूनही पुन्हा अर्ज भरता येत नाहीं.

आधी भरलेला अर्ज गट नंबर चुकल्याने सोलार मिळेना, त्याचे भरलेले पैसेही परत मिळेना, पुन्हा अर्ज करायला गेलो तर अर्जही घेतल्या जाईना, त्यामुळे करावे काय हा प्रश्‍न आपल्या समोर असल्याचे श्री. राठोड यांचे म्हणणे आहे.

श्री. राठोड यांच्या समोर आलेल्या तक्रारीने एकीकडे मागेल त्याला सोनार पंप योजना शासन राबविते, तर दुसरीकडे सोलार पंप मिळण्यात अनंत अडचणी अनेकांना येत असल्याची बाब पुन्हा एकदा अधोरेखित होते आहे.