Rajewadi Water Lake : राजेवाडी तलाव भरल्याने शेतीचा पाणीप्रश्‍न निकाली

Sangli News : राजेवाडी (ता. आटपाडी) येथील माणगंगा नदीवरील ब्रिटीशकालीन राजेवाडी तलाव तुडुंब भरून सांडव्यावरून पाणी वाहू लागले आहे. त्यामुळे माणगंगा नदीही दुथडी भरून वाहू लागल्याने दिघंचीसह परिसरातील गावातील शेतकऱ्यांचा पाणीप्रश्न निकाली निघणार आहे. राजेवाडी येथील तलाव ब्रिटीश राणी व्हिक्टोरिया यांनी बांधला आहे.

या तलावाची तीन टीएमसी पाणीसाठवण क्षमता आहे. पाण्याचा आडवा पसार नऊ किलोमीटर, तर लांब वीस किलोमीटर परिसरात पसरला आहे. तलावाचे वैशिष्ट्य म्हणजे पाणलोट क्षेत्र आणि पाणीसाठा सातारा जिल्ह्यात तलावाचा बांध आणि पाणी सांगली जिल्ह्यात, तर पाण्याचा वापर सोलापूर जिल्ह्यातील शेतकरी करतात.

राजेवाडी तलावाची क्षमता ३०७० दशलक्ष घनफूट आहे. तलावात गाळाचा साठा वाढल्यामुळे पाणी साठवून क्षमता कमी झाली आहे. सध्या १५७७ दशलक्ष घनफूट पाणीसाठा झाला आहे. गेल्या चार महिन्यांपासून जिहे कटापूर योजनेचे पाणी राजेवाडीत चालू होते. त्यामुळे तलावात २३ फूट इतका पाणीसाठा झाला.

काही दिवसांपूर्वी तलावाच्या पाणलोट क्षेत्रात प्रचंड मोठा पाऊस झाला. कुळुकजाई येथे ढगफुटीसदृश पाऊस झाला. त्यामुळे आंधळी, पिंगळी, झाशी, राणद, मासाळवाडी हे तलाव भरून राजेवाडी तलावात पाणी आणले. कटेपूर योजनेचे आलेले पाणी आणि पडलेला पाऊस व अतिवृष्टी यामुळे राजेवाडी तलाव पूर्ण क्षमतेने भरून सांडव्यावरून पाणी वाहू लागले आहे. यामुळे माणगंगा नदी वाहू लागली आहे. या पाण्याचा तलावाखालील ४४ हजार हेक्टर क्षेत्राला थेट, तर दीड लाख हेक्टर क्षेत्राला अप्रत्यक्ष लाभ होणार आहे.

गेल्यावर्षी तलाव होता कोरडा

आटपाडी तालुक्यातील आठ किलोमीटरचा बोगदा काढून हे पाणी सोलापूर जिल्ह्याच्या हद्दीत नेले आहे. तालुक्यात राजेवाडी, लिंगीवरे, दिघंची, पुजारवाडी आणि लगतच्या गावांतील शेतीला मोठे वरदान मिळाले आहे. सहा वर्षांपासून अपेक्षित पाऊस पडत असल्यामुळे राजेवाडी तलावात समाधानकारक पाणीसाठा होत होता. मात्र, गतवर्षी पावसाने दडी मारल्यामुळे तलाव कोरडा पडला. यामुळे तलाव परिसरातील गावात टंचाईची परिस्थिती निर्माण झाली होती. अनेक गावांना टँकरने पिण्याचा पाण्याचा पुरवठा सुरू केला.