Agriculture Sowing : पावसाच्या आगमनाने पेरणीला वेग

Palghar News : पालघर जिल्ह्यातील ७० टक्क्यांपेक्षा जास्त कुटुंबे ही शेतीवर अवलंबून आहेत. पावसाने बुधवारी (ता. १९) सकाळपासून सुरुवात केल्याने शेतकऱ्यांमध्ये आनंदाचे वातावरण निर्माण झाले आहे. डहाणू, तलासरी तसेच पालघर तालुक्याचा काही भागांमध्ये पेरणीलायक पाऊस झाला आहे.

मात्र, जव्हार, मोखाडा या भागांमध्ये पाऊस झालेला नाही. पावसाने बळीराजाच्या आशा पल्लवित झाल्या आहेत, असे शेतकरी संजय पाटील यांनी सांगितले. जिल्ह्यातील वातावरण पोषक असल्याने शेतकऱ्यांनी पेरणीस विलंब लावू नये; अन्यथा पुढील शेतीच्या कामांना उशीर होईल, असे डहाणूचे प्रभारी तालुका कृषी अधिकारी जगदीश पाटील यांनी सांगितले.

गेल्या आठवड्यात पावसाने मेघगर्जनेसह दमदार हजेरी लावली होती. पाऊस सातत्याने आणि नित्यनेमाने सुरू राहील, या आशेने काही शेतकऱ्यांनी पेरणीला सुरुवात केली होती; परंतु चित्र उलटे झाले. काही दिवसांत शेतकऱ्यांच्या दृष्टीने अपेक्षित पाऊस झाला नाही. त्यामुळे पेरणी करावी, की करू नये? या चिंतेने शेतकरी त्रस्त झाले होते. अशा परिस्थितीत मंगळवारी (ता. १८) आणि बुधवारी (ता. १९) सकाळपासून जिल्ह्यात पावसाने सुरुवात केल्यामुळे पेरणीच्या कामांना वेग येणार आहे, असे शेतकरी संजय पाटील यांनी सांगितले.

दुबार पेरणीचे संकट टळले

वाढलेल्या बियाण्यांच्या किमती, औषधे, खते, बी-बियाणे यांचे वाढलेले दर, मजूर खर्च, दुबार बी-बियाणे खरेदी करण्यासाठी जाणवणारा तुटवडा या आर्थिक अडचणींचा सामना करावा लागणार की काय? अशा परिस्थितीत शेतकऱ्यांच्या मदतीला मेघराज धावून आले आणि बरसले. त्यामुळे शेतकऱ्यांच्या आशा जिवंत राहिल्या आहेत.