Orange Export : संत्रा निर्यातीसाठी इतर पर्यायांचा विचार करणार

Amravati News : बांगलादेशकडून संत्रा आयात शुल्कात सातत्याने वाढ केली जात आहे. त्या पार्श्‍वभूमीवर निर्यातीसाठी एकाच देशावर अवलंबून न राहता इतर पर्यायांची चाचपणी करून संत्रा बागायतदारांना दिलासा देण्याचा केंद्र सरकारचा प्रयत्न असणार आहे. त्याकरिता सोमवारी (ता.२९) वाणिज्य मंत्रालयस्तरावर बैठक घेणार असल्याची ग्वाही वाणिज्यमंत्री पीयूष गोयल यांनी व्यापारी व बागायतदारांना दिली.

इंडो-बांगला ऑरेंज असोसिएशनचे अध्यक्ष सोनू खान, ताज फ्रूट कंपनीचे ताज खान, श्रमजीवी शेतकरी उत्पादक कंपनीचे मुख्य कार्यकारी अधिकारी रमेश जिचकार, संचालक प्रमोद पाटील, आमदार देवेंद्र भुयार, राज्यसभा सदस्य प्रफुल्ल पटेल यांचा या शिष्टमंडळात समावेश होता. संसद भवन येथील वाणिज्य मंत्रालयात ही भेट झाली. या वेळी राज्यात सुमारे दीड लाख हेक्‍टर तर एकट्या अमरावती जिल्ह्यात एक लाख हेक्‍टर संत्रा आहे.

आंबिया आणि मृग मिळून दहा लाख टन उत्पादकता आहे. आंबिया हंगामात साडेपाच ते सहा लाख टन संत्रा फळांचे उत्पादन होते. यातील दीड लाख टन संत्रा फळांची निर्यात बांगलादेशला होते. त्यामुळे उर्वरित फळांना देशांतर्गंत बाजारपेठेत चांगला दर मिळतो. गेल्या तीन वर्षांत बांगलादेशने सातत्याने भारतीय संत्र्याच्या आयातीवर शुल्क वाढ केली आहे. गेल्या वर्षी ८८ टका (बांगलादेशी चलन) असलेले आयात शुल्क आता १०१ टका करण्यात आले आहे. त्यानुसार प्रती किलो ७१ रुपये आयात शुल्कापोटी द्यावे लागणार आहेत. त्यामुळे निर्यात प्रभावित होण्याची भीती असल्याचा मुद्दा मांडण्यात आला.

हे सुचविले उपाय

व्यापारी व बागायतदारांशी संवाद साधल्यानंतर पीयूष गोयल यांनी नॅशनल को-ऑपरेटिव्ह कन्झुमर फेडरेशनचे विरेंद्र सिंग यांना फेडरेशनमार्फत हंगामात संत्रा खरेदी शक्‍य आहे का, याबाबत विचारणा करून सविस्तर अहवाल मांडण्यास सांगितले. बांगलादेश दूतावासातील निर्यात कक्ष प्रमुखांशी संपर्क साधण्यात आला.