Potato Seed : राज्यात चार विद्यापीठे असूनही बटाटे बियाणे निर्मितीच होत नाही

Ahilyanagar News : राज्यातील सुमारे दहा जिल्ह्यांत बटाट्याचे मोठ्या प्रमाणात उत्पादन घेतले जाते. मात्र राज्यात चार कृषी विद्यापीठे असूनही बटाटा बियाणांची निर्मिती होत नाही. बटाटा बियाणांवर फारसे संशोधन झाले नाही. राज्यात दर्जेदार बियाणे मिळत नाही. बटाटा उत्पादक शेतकऱ्यांना परराज्यातून बियाणे मागवावे लागते. त्यामुळे आपसूकच खर्च वाढतो अशी खंत बटाटा पिकांतील अभ्यास व उत्पादक शेतकरी गोवर्धन खेडकर यांनी कृषिमंत्र्यांकडे खंत व्यक्त केली.

कृषिमंत्री माणिकराव कोकाटे यांच्या उपस्थितीत पुण्यात नुकतेच विभागीय शेतकरी कार्यशाळेत अभ्यासू शेतकऱ्यांचा परिसंवाद कार्यक्रम झाला. त्यात भालगाव (ता. पाथर्डी) बटाटा पिकांतील अभ्यासू व उत्पादक शेतकरी गोवर्धन प्रल्हाद खेडकर सहभागी झाले होते. त्यांनी राज्यात बटाटा बियाणेच निर्मिती होत नसल्याची खंत कृषिमंत्र्याकडे व्यक्त केली.

राज्यात अहिल्यानगर, बीड, छत्रपती संभाजीनगर, पुणे, सातारा, सांगलीसह दहापेक्षा अधिक जिल्ह्यांत बटाट्याचे उत्पादन घेतले जाते. विविध पिकांत आंतरपीक म्हणूनही बटाट्याचे उत्पादन घेतले जाते. दुष्काळी भागातील पीक म्हणून बटाटा पीक पुढे येत असताना दर्जेदार बियाणे मिळत नसल्याने उत्पादन कमी होत आहे. राज्यात चार कृषी विद्यापीठे असताना बाहेरील राज्यातून बटाटा बियाणे आणून लागवड करावी लागते. यामुळे एकरी उत्पादन खर्च वाढतो. शीतगृहाची सुविधा नाही.

सध्या पंजाब, गुजरातमधून तीन नंबर बियाणे येते. त्यामुळे महाराष्ट्रात बटाट्याची उत्पादकता कमी आहे. राज्यात सध्या एकरी ८ ते १२ टनापर्यंत उत्पादन मिळते तर अन्य राज्यात एकरी १५ टनापर्यंत उत्पादन येत आहे. बियाणे वाहतूक, व अन्य बाबींमुळे दुप्पट दराने बियाणे खरेदी करावे लागत आहे. खासगी टिश्युकल्चरमधील बटाटा बियाणे तयार करण्याला सुरुवात झाली असताना सरकारी संशोधन केंद्रातून फारसे काही केले जात नसल्याची खंत खेडकर यांनी व्यक्त केली.

बटाटा हे पीकविमा योजनेत समाविष्ट नसल्याचे त्यांनी सांगितले. हवामानाची अनुकूलता नाही. हवामानास अनुकूल राहील, असे संशोधित बटाटा वाण निर्मितीसाठी संशोधन सुरू असल्याचे उत्तर अधिकाऱ्यांनी दिले. असले तरी बटाटा बियाणांबाबत फारसे सांगू शकले नाही. कोकाटे यांनी बटाटा बियाणांबाबत संशोधनासाठी पुढाकार घेण्याच्या सूचना संशोधन केंद्राला दिल्याचे सांगण्यात आले.