Wheat Farming: पुणे विभागात गहू पीक पक्वतेच्या अवस्थेत

Pune News: रब्बी हंगामात गव्हाच्या पेरणीस उशिराने पोषक हवामान तयार झाल्याने गहू पिकाला पसंती दिली आहे. पुणे विभागातील अनेक शेतकरी गहू पिकाकडे वळाले आहेत. सध्या पीक पक्वतेच्या अवस्थेत असून अनेक ठिकाणी पीक पक्व होत आहे. येत्या दहा ते पंधरा दिवसांत गव्हाच्या काढणीला सुरुवात होईल, असे कृषी विभागाच्या सूत्रांनी सांगितले.

यंदा विभागात सरासरी एक लाख ६८ हजार २३१ हेक्टरपैकी दोन लाख ४० हजार २३१ म्हणजेच १४२ टक्के पेरणी झाली आहे. सरासरीच्या तुलनेत पेरणीच्या क्षेत्रात तब्बल ७२ हजार हेक्टरने वाढ झाली आहे. सध्या पिके जोमात असून उत्पादनात काही प्रमाणात वाढ होईल. पावसाळ्यात चांगल्या झालेल्या पावसामुळे गव्हाच्या पेरणीच्या क्षेत्रात वाढ होण्याचा अंदाज कृषी विभागाच्या सूत्रांचा होता.

गव्हाच्या पेरणीस नोव्हेबर ते डिसेंबर हा कालावधी चांगल्या असतो. मात्र, उशिराने झालेल्या पावसामुळे आणि वेळेत वाफसा न झाल्याने अनेक शेतकऱ्यांनी उशिराने पेरण्या करण्यास सुरुवात केली. सध्या अनेक ठिकाणी गहू पीक निसवण्याच्या व पक्वतेच्या अवस्थेत आहे. पुणे जिल्ह्याचा पूर्वेकडील भाग, नगर जिल्ह्याच्या उत्तरेकडील तालुके, सोलापुरातील अक्कलकोट, मंगळवेढा, दक्षिण सोलापूर, मोहोळ हे तालुके गव्हाच्या पिकासाठी ओळखले जात असून विभागात नेवासा तालुक्यात सर्वाधिक पेरणी झाली आहे.

नगर जिल्ह्यातही चांगल्या पेरण्या झाल्या असून आतापर्यंत गव्हाची पेरणी नेवासा, कोपरगाव, नगर, श्रीगोंदा, कर्जत, शेवगाव तालुक्यात झाली आहे. इतर तालु्क्यातही चांगल्या पेरण्या झालेल्या आहेत. पुणे जिल्ह्यातील बारामती, शिरूर तालुक्यात सर्वाधिक गव्हाची सर्वाधिक पेरणी झाली आहे.

तर इंदापूर, दौंड, पुरंदर, जुन्नर या तालुक्यांत चांगल्या पेरण्या झाल्या आहेत. तर हवेली, मुळशी, मावळ, वेल्हे, भोर, आंबेगाव तालुक्यात कमीअधिक पेरण्या झाल्या आहेत. सोलापूर जिल्ह्यातही अक्कलकोट तालुक्यात सुमारे ९ हजार ४३३ हेक्टरवर पेरणी झाली आहे. तर दक्षिण सोलापूर, मोहोळ, दक्षिण सोलापूर, माढा, करमाळा, पंढरपूर, सांगोला, माळशिरस, मंगळवेढा या तालुक्यांतही चांगली पेरणी झाली आहे.

पुणे विभागात झालेली गव्हाची पेरणी, हेक्टरमध्ये

जिल्हा सरासरी क्षेत्र झालेली पेरणी टक्केवारी

नगर ८६,४०५ १,४३,९१२ १६७

पुणे ३९,८०३ ४४,२१० १११

सोलापूर ४२,५८८ ५२,१०८ १२२

एकूण १,६८,७९६ २,४०,२३१ १४२