Water Scarcity : ऐन पावसाळ्यात पुरंदरमध्ये ८२ टँकरने पाणीपुरवठा

Pune News : पावसाळा सुरू होऊन, तीन आठवडे उलटून गेल्यानंतर, पुरंदर तालुक्यातील दुष्काळाचे सावट दिवसेंदिवस गडद होताना दिसत आहे. गेल्या वर्षभरापासून पिण्यासाठी, पशुधनासाठी व शेतीसाठी लागणाऱ्या पाणीबाबत मोठा प्रश्‍न नागरिकांसमोर उभा ठाकला आहे. तर तालुक्यातील ३५ गावठाणांसह, ३२१ वाड्या- वस्त्यांवर जवळपास ८२ पाण्याचे टँकर सुरू आहेत.

मागील वर्षी, अति अल्प पर्जन्यमान झाले होता. शासनाकडून दुष्काळ जाहीर करण्यात आला होता. केंद्रस्तरीय समितीने दुष्काळाची दाहकताही तपासली; मात्र त्यावरील उपाययोजना कुठल्याही प्रकारच्या करण्यात आल्या नाहीत. पुरंदर तालुक्यामध्ये प्रामुख्याने चारा छावण्या चालू कराव्यात, विविध गावांना पाण्याच्या टँकरद्वारे पाणीपुरवठा करावा, चारा डेपो चालू करावेत.

तर तालुक्यातील बंद योजना त्वरित चालू करावे, अशा विविध मागण्या दुष्काळग्रस्त भागातील नागरिकांनी शासनाकडे वारंवार केल्या होत्या. मात्र संबंधित प्रशासनाकडून कोणतीही ठोस उपाययोजना करण्यात आली नसल्याने दाद मागायची कोणाकडे असा प्रश्‍न शेतकरी आणि नागरिकांसमोर उभा राहिला आहे.

टँकरची संख्या सातने कमी

पावसाळा सुरू होण्याआधी तालुक्यात एकूण ४२ गावठाणसह ३६३ वाड्या-वस्त्यांवर ९३ टँकरच्या माध्यमातून २८८ खेपा सुरू होत्या. मात्र पावसाळा सुरू झाल्यानंतर ४२ गावांत सुरू असलेले ७ टँकरची संख्या कमी होऊन ३५ झाली आहे.

३६३ वाड्या-वस्त्यांवर सुरू असलेले टँकर आता ३२१ वाड्या-वस्त्यांवर सुरू आहेत. सद्यःस्थितीत ८२ टँकरच्या माध्यमातून २५६ टँकरच्या खेपा सुरू आहेत, अशी माहिती पाणीपुरवठा विभागाकडून देण्यात आली आहे.

...या ठिकाणी धावताहेत टँकर

सोनोरी, वाल्हे, वागदरवाडी, रीसे, पिसे, राजुरी, साकुर्डे, जवळार्जुन, दौंडज, दिवे, झेंडेवाडी, साकुर्डे, पांडेश्‍वर, खळद, बोपगाव, नायगाव, सुकलवाडी, पिंगोरी, दौंडज, आंबळे, सिंगापूर, गुर्हळी, राख, नावळी, मावडी कडेपठार, आडाचीवाडी, कुंभारवळण, एखतपूर, खानवडी आदींसह तालुक्यातील अनेक गावांत टँकरच्या माध्यमातून पाणीपुरवठा केला जात आहे.