Water Storage : नांदेड जिल्ह्यातील पाणीसाठ्यात सात दिवसांत २१.६२ दलघमीने घट

Nanded News : नांदेडमध्ये सध्या उन्हाची तीव्रता वाढल्यामुळे प्रकल्पातील पाणीसाठ्यात झपाट्याने घट होत आहे. आज घडीला जिल्ह्यातील मोठे, मध्यम, लघू प्रकल्प, केटीवेअरसह उच्च पातळी बंधाऱ्यात ३७६.५५ दशलक्ष घनमीटरनुसार ५१.७२ टक्के पाणीसाठा शिल्लक आहे. मागील आठवड्यात ३९८.१७ दलघमी पाणीसाठा होता.

सात दिवसातच २१.६२ दलघमी पाणीसाठा घटल्याची माहिती नांदेड पाटबंधारे विभागाकडून देण्यात आली. नांदेड जिल्ह्यात मागील वर्षी झालेल्या दमदार पावसामुळे जिल्ह्यातील संपूर्ण प्रकल्पात शंभर टक्के पाणीसाठा झाला होता.

भूगर्भातील पाणी पातळीही वाढली होती. यामुळे यंदा नांदेड पाटबंधारे विभागाने रब्बी तसेच उन्हाळी पाणी पाळ्यांचे नियोजन करुन सिंचनासाठी पाणी सोडण्यात आले. यामुळे प्रकल्पातील पाणी पातळी खालावली होती.

यासोबतच मागील काही दिवसापासून उन्हाची तीव्रता वाढल्याने पाण्याचे बाष्पीभवन होत आहे. परिणामी पाणीसाठ्यात झपाट्याने घट होऊन पाणीसाठा ५१ टक्क्यांवर खालावला आहे. एका आठवड्यात प्रकल्पातील पाणीसाठ्यात लक्षणीय घट झाली आहे.

मागील आठवड्यात ३९८.१७ दलघमी पाणीसाठा होता. सात दिवसातच यात २१.६२ दलघमीने कमी येऊन पाणीसाठा घटला आहे. सध्या जिल्ह्यात मोठा प्रकल्प असलेल्या विष्णुपुरी प्रकल्पात ४५.८७ टक्के पाणी शिल्लक आहे. तर दुसरा मोठा प्रकल्प असलेल्या मानार (बारुळ) प्रकल्पात ६० टक्के पाणीसाठा आहे.

प्रकल्पनिहाय पाणीसाठा

प्रकल्प दलघमी टक्केवारी

विष्णुपुरी ३७.०६ ४५.८७

मानार ८२.९६ ६०.०२

मध्यम प्रकल्प (९) ७७.५७ ५५.७८

लघू प्रकल्प (८०) ६८.१४ ३९.४३

उच्चपातळी बंधारे (९) ११०.८१ ५८.३८

को.प.बंधारे (चार) ०.०२ ०.२७

एकूण प्रकल्प ३७६.५५ ५१.७२

जिल्ह्याशेजारील प्रकल्प

येलदरी ६३८.११ ७८.८०

सिद्धेश्‍वर ३९.८२ ४९.१९

इसापूर ६९९.४७ ७२.५५