Atpadi Barrage Leakage : आटपाडीत कोल्हापूर पद्धतीच्या दहा बंधाऱ्यांना गळती

Sangli News : ‘कृष्णा खोरे’अंतर्गत आटपाडी तालुक्यात ओढ्यावर बांधलेले पाच नवीन आणि पाच जुने अशा दहाही कोल्हापूर पद्धतीच्या बंधाऱ्यांना एकच दरवाजा असल्याने मोठी गळती लागली आहे. यातील पाच बंधारे सहा महिन्यांपूर्वीचे आहेत. त्यामुळे बंधारे लगेच रिकामे होतात.

कृष्णा खोरे महामंडळांतर्गत ‘टेंभू’चा भाग म्हणून तालुक्यात माणगंगा नदीसह ओढ्यावर १५ कोल्हापूर बंधारे बांधले आहेत. दहा जुने, तर पाच नवीन आहेत. माण नदीवरील पाचही बंधाऱ्यांना पाणी अडवण्यासाठी दुहेरी दरवाजे आहेत. त्यामुळे पाण्याच्या दाबाने पहिल्या दरवाजातून गळती झालेले पाणी दुसऱ्या दरवाजात दाब कमी झाल्याने थांबते.

शिवाय दोन दरवाजांमध्ये माती टाकल्याने गळती होत नाही. मात्र, उर्वरित दहा बंधाऱ्यांना एकच दरवाजा आहे. हे बंधारे शेटफळे, गोमेवाडी, नेलकरंजी, दिघंची, अनुशे मळा, झरे, विठलापूर, आटपाडी शुकओढा, देशमुखवाडी येथे आहेत. यातील शेटफळे, अनुसेवाडी, देशमुखवाडी, दिघंची आणि झरे येथील पाच बंधारे नुकतेच बांधले आहेत.

‘टेंभू’अंतर्गत या बंधाऱ्याच्या पायाचे काम पंधरा वर्षांपूर्वी झाले होते. त्यानंतर निधीअभावी काम अनेक वर्षे रखडले. अर्धवट बंधाऱ्याचे काम पूर्ण करावे, अशी शेतकऱ्यांची अनेक वर्षांपासून मागणी होती. आमदार दिवंगत अनिल बाबर यांनी विशेष प्रयत्न करून ‘टेंभू’अंतर्गत रखडलेल्या बंधाऱ्यासाठी निधी आणला. गतवर्षी या बंधाऱ्याचे काम झाले. या नवीन बंधाऱ्‍यांना पाणी अडवण्यासाठी प्रत्येक गाळ्यात एकच लोखंडी दरवाजा आहे.

या दरवाजातून मोठ्या प्रमाणावर गळती लागली आहे. संबंधित ठेकेदाराने बंधाऱ्यात पाणीसाठा करून पाटबंधारे विभागाकडे हस्तांतरित केलेत. तसेच एक दरवाजा असलेले जुने पाच बंधारेही गळतात. या बंधाऱ्‍यांना सात ते दहा कप्पे असून प्रत्येक कप्प्याच्या दारातून मोठ्या प्रमाणावर पाणी वाहून जाते.

स्थानिक शेतकरी बारदाणा, प्लॅस्टिकची पोती आणि आणि जुन्या कपड्याचा वापर करून गळती थांबवण्याचा प्रयत्न करतात. मात्र अपेक्षित गळती रोखता येत नाही. सध्या ‘टेंभू’चे पाणी सोडले आहे. त्याने बंधारे भरून घेतलेत. मात्र गळती मोठी असल्याने अवघ्या दहा-पंधरा दिवसांत बंधारे पुन्हा कोरडे पडणार आहेत. सर्व शेतकऱ्यांनी पाटबंधारे विभागाकडे तक्रारी केल्या आहेत.