Khadimal Water Crisis : खडीमलच्या ग्रामस्थांचा जीव धोक्यात

Amaravati News : यंदा चिखलदरा तालुक्यातील पाणीटंचाईची स्थिती अतिशय गंभीर दिसत आहे. खडीमल या गावातील नागरिकांना मोठ्या अडचणींना सामोरे जावे लागत आहे. सध्या या गावाला तीन ते चार टॅंकरद्वारे पाणीपुरवठा केला जात असला तरी प्रत्यक्षात टॅंकरची संख्या अधिक वाढविण्याची मागणी नागरिकांकडून केली जात आहे.

यंदा चिखलदरा तालुक्यातील अनेक गावांना पाणीटंचाईचा सामना करावा लागत असून त्यामध्ये खडीमल या गावातील परिस्थिती अतिशय भीषण आहे. तेथे तीन ते चार टॅंकरद्वारे पाणीपुरवठा केला जात असला तरी तो अपुरा आहे. पाण्यासाठी जिवाची पर्वा न करता रात्री-अपरात्री महिलांना भटकंती करावी लागत आहे.

त्यामुळे पाण्याच्या टॅंकरची संख्या वाढविण्याची मागणी स्थानिक ग्रामस्थांनी केली आहे. त्यासंदर्भात मुख्य कार्यकारी अधिकाऱ्यांना निवेदन देण्यात आले. निवेदन देतेवेळी माधुरी बेठेकर, जयराम सावलकर, सीमा कासदेकर, सुगुणा धिकार, अलका कास्देकर, बीबी कासदेकर, श्याम सावलकर, सुनीता धिकार, मुंगीलाल धिकार, मुन्ना जामूनकर, सायक जामूनकर, विजय सावलकर, रामबा इसावलकर यांचा समावेश होता.

..तर जबाबदार कोण?

खडीमल या गावातील ग्रामस्थांकडून पाण्यासाठी आपला जीवसुद्धा धोक्यात टाकण्यात येत असल्याचा व्हिडिओ समाजमाध्यमांवर व्हायरल होत आहे. त्यामध्ये केवळ पुरुषच नाही तर महिला आणि लहान मुलीसुद्धा आपला जीव धोक्यात घालून पाणी मिळविण्यासाठी आटापिटा करीत असल्याचे दिसून येत आहे.

हे दृश्य केवळ एक दिवसाचेच नाही तर दररोज जीवावर उदार होऊन नागरिकांना अशा प्रकारे पाणी मिळवावे लागत आहे. त्यामुळे एखादी घटना घडली तर त्याला जबाबदार कोण? असा प्रश्न विचारण्यात येत आहे.