Turmeric Rate : वायगाव हळद बेण्याच्या किमतीत दुपटीने वाढ

Vardha News : यंदा जागतिक स्तरावर हळदीची वाढती मागणी वाढल्याने भावात मोठी वाढ झाली. त्यामुळे दरवर्षी वायगाव हळदीचे मातृ कंद सहा हजार रुपये क्विंटलप्रमाणे मिळत होते. त्याचे भाव आता १२ हजार रुपये प्रती क्विंटलवर गेले आहेत. परिणामी बेणे मिळणे कठीण झाले आहे. ओली हळद कांडी शेंग गतवर्षी ३० ते ४० रुपये प्रति किलो मिळायचे आता ते ८० रुपये प्रति किलोवर गेले आहे.

गतवर्षी हळदीला अपेक्षेपेक्षा जादा भाव मिळाले. त्यामुळे यंदा हळद लागवडीकडे शेतकऱ्यांचा कल वाढला आहे. समुद्रपूर तालुक्यातील वायगाव हळदीला चांगला भाव मिळत असल्याने राज्यातून बियाण्यांची मागणी वाढली आहे. परिणामी बियाण्याच्या किमती गगनाला भिडल्या आहे.

यावर्षी सुकलेल्या हळद कांडीला २२ हजार ते २७ हजारपर्यंत भाव मिळाले आहे. सरासरी २५ हजार रुपये किमतीने शेतकऱ्यांनी हळद कांडीची विक्री केली. दरवर्षीच्या तुलनेत यावर्षी दुपटीने भाव मिळाले. गत वर्षात हळद पावडर २०० रुपये किलो प्रमाणे मिळायचा यावर्षी ३०० रुपये किलोप्रमाणे ग्राहकांना घ्यावा लागत आहे. समुद्रपूर तालुक्यात १९० हेक्टरमध्ये वायगाव हळद लागवडीचे क्षेत्र आहे. यावर्षी ते वाढून २२० हेक्टर होण्याची शक्यता कृषी विभागाच्या वतीने वर्तविण्यात आली आहे. कोरोनाच्या काळात वायगाव हळदीची महती इतर देशात पोहोचल्याने मागणीत वाढ झाली आहे. इतर हळद जातीच्या उत्पादनाला यावर्षी अधिक भाव मिळत असल्याने त्याचा फायदा वायगाव हळद उत्पादकांना होत आहे.

वाढीव दरामुळे बियाणे राखण्याकडे दुर्लक्ष

गत वर्षात वायगाव हळदीला मिळालेल्या दरामुळे येथील उत्पादकांनी त्यांच्याकडे असलेली हळद विकण्याकडे अधिक लक्ष दिले. यामुळे आता शेतकऱ्यांकडे पेरणीकरिता मातृकंद शिल्लक नाही. अशात वायगाव हळदीला राज्यात मागणी होत आहे. असे असताना येथील उत्पादक कंपन्या त्यांना बियाणे पुरविण्यात असक्षम ठरत आहेत.