Irrigation Well : सोलारूर जिल्ह्यात गाव निहाय, १० शेततळी, १० विहिरी खोदणार

Solapur News : जिल्ह्यातील दुष्काळ परिस्थितीवर मात करण्यासाठी ग्रामीण भागात प्रत्येकाला ‘रोहयो’तून काम मिळावे, यासाठी शासनाने तातडीने आराखडे तयार करण्याचे आदेश दिले आहेत.

त्यानुसार सात विभागांच्या माध्यमातून दुष्काळग्रस्तांना २५ प्रकारची कामे उपलब्ध करून दिली जाणार आहेत. त्यात प्रामुख्याने प्रत्येक ग्रामपंचायतीने लाभार्थी निवडून किमान १० शेततळी आणि १० विहिरी पूर्ण करण्याचे उदिष्ठही ठरवण्यात आले आहे.

जिल्ह्यातील सर्वच तालुक्यांमध्ये दुष्काळ जाहीर झाला आहे. दुष्काळाच्या अनुषंगाने सध्या रोजगार हमी योजनेचे तालुकानिहाय आराखडे तयार करण्याची कार्यवाही पंचायत समिती गटविकास अधिकाऱ्यांच्या माध्यमातून सुरू आहे.

जिल्ह्याचा आराखडा २० डिसेंबरपर्यंत पूर्ण करून तो २० जानेवारीपर्यंत जिल्हा परिषदेला पाठविणे अपेक्षित आहे. त्यानंतर कामांना प्रारंभ होणार आहे. दुष्काळाची तीव्रता कमी व्हावी, कामाच्या शोधात नागरिकांना गाव सोडायला लागू नये, यासाठी ‘रोहयो’चा मोठा आधार आहे.

दुष्काळग्रस्त गावांमध्ये सार्वजनिक व वैयक्तिक स्वरूपाच्या योजनांमधून कामे केली जातील. केंद्र सरकारकडून ‘रोहयो’तून प्रत्येकाला १०० दिवस तर राज्य सरकारकडून २६५ दिवस काम दिले जाते.

त्याअंतर्गत दुष्काळी भागात कृषी, सार्वजनिक बांधकाम, जिल्हा परिषदेचा सार्वजनित बांधकाम व लघु पाटबंधारे विभाग, जिल्हा जलसंधारण विभाग, सामाजिक वनीकरण व जिल्हा वन विभागाच्या माध्यमातून कामे उपलब्ध करून दिली जाणार आहेत.

दुष्काळाच्या अनुषंगाने कामे करताना काही प्रमाणात निकषांत शिथिलता देण्याचे अधिकार पंचायत समिती गटविकास अधिकाऱ्यांना देण्यात आले आहेत. लोकसभा निवडणुकीच्या आचारसंहितेची शक्यता गृहीत धरून राज्य सरकारने त्यासंदर्भातील स्वतंत्र आदेश काढून १५ फेब्रुवारीपूर्वी सर्व कामांना मंजुरी देण्यात यावी, असेही स्पष्ट केले आहे.

दुष्काळी भागात ‘रोहयो’ तून होणार ‘ही’ कामे

दुष्काळी भागात शेततळे (प्रत्येक गावात १०) आणि त्याशिवाय कंपार्टमेंट बंडिंग, माती नालाबांध, गॅबियन स्ट्रक्चर, भूमिगत बंधारे, गांडूळखत निर्मिती, पाणंद रस्ते, शेत रस्ते, गाळ काढणे, अपूर्ण पाझर तलाव पूर्ण करणे, नाला सरळीकरण व खोलीकरण, सिंचन विहिरी, रोपवाटिका, वृक्ष लागवड अशी कामे होणार आहेत.