Silk Market : विदर्भातील एकमेव रेशीम बाजारालाही टाळे

Amaravati News : मोठा गाजावाजा करून सुरू करण्यात आलेल्या विदर्भातील पहिल्या रेशीम बाजाराला अवघ्या सहा ते सात महिन्यांतच टाळे ठोकण्याची नामुष्की रेशीम संचलनालयावर आली आहे. दर्जेदार रेशीम कोशाची उपलब्धता नसणे, सोईसुविधांचा अभाव अशा विविध कारणांमुळे हे घडल्याचा आरोप होत आहे.

राज्यातील इतर भागांप्रमाणे या भागात उत्पादित कोशाला याच परिसरात बाजारपेठ उपलब्ध व्हावी याकरिता रेशीम संचालनालयाने पुढाकार घेत अमरावती येथे रेशीम बाजाराचा प्रस्ताव दिला होता. यामुळे रेशीम कोष उत्पादकांचा वाहतुकीवरील खर्च वाचेल या उद्देशाने व्यापारी सतीश बेतल यांनी देखील त्यासाठी पुढाकार घेतला.

अल्पावधीतच या दोघांच्या समन्वयातून रेशीम बाजार सुरू झाला. सुरुवातीला शेतकऱ्यांचा याला कमी प्रतिसाद होता. त्यानंतर तो वाढल्याने याच ठिकाणी कोशावर प्रक्रिया व्हावी याकरिता बडनेरा रेशीम पार्कमध्ये असलेली यंत्रणा सतीश बेतल यांनी भाडेतत्त्वावर घेण्याचे ठरविले.

परंतु या ठिकाणी जुनी यंत्रणा असल्याने त्याच्या दुरुस्तीवरच ९ ते साडेनऊ लाख रुपयांचा खर्च झाल्याचे सतीश बेतल सांगतात. मात्र त्यानंतरही श्रम आणि वेळेत अपेक्षित धागा उत्पादनाचा पल्ला गाठता आला नाही. त्यामुळे त्यांनी याचा नाद सोडला.

दरम्यान, इतर राज्यांतून देखील काही व्यापारी रेशीम कोष खरेदीसाठी बडनेरा परिसरात येत होते. रामनगरला असलेला दर या ठिकाणी मिळावा, अशी रेशीम कोष उत्पादकांची अपेक्षा होती.

परंतु कोषाचा दर्जा नसल्यामुळे हा दर व्यापाऱ्यांकडून दिला जात नव्हता. यामुळे देखील व्यापारी व रेशीम कोष उत्पादकांमध्ये गैरसमज वाढीस लागले, असेही सांगितले जाते. परिणाम कोष आवकेवर झाला. आवक होत नसल्याने व्यापारी देखील फिरकत नव्हते. प्रशासनाकडून अपेक्षित सोईसुविधा देखील पुरविण्यात आल्या नसल्याचे सांगितले जाते. अशा साऱ्या घटकांचा परिणाम होत हा बाजार बंद पडला. एकमेव रेशीम कोष बाजार अल्पावधीतच बंद पडल्याने रेशीम कोष उत्पादकांची मात्र पुरती निराशा झाली आहे.