Vegetable Research Centre : एकार्जुना येथे होणार भाजीपाला संशोधन केंद्र

Chandrapur News : ‘‘वरोरा तालुक्यातील ऐकार्जुना येथे कापूस उत्पादन संशोधन केंद्र असून आता नव्याने ऐकार्जुना येथे ३१ कोटी ९० लक्ष रुपये खर्च करून उच्च तंत्रज्ञानयुक्त भाजीपाला संशोधन केंद्र उभे राहणार आहे,’’ अशी घोषणा पालकमंत्री सुधीर मुनगंटीवार यांनी केली.

चांदा क्लब ग्राऊंड येथे आयोजित जिल्हास्तरीय कृषी महोत्सवाच्या उद्‌घाटन कार्यक्रमात अध्यक्ष म्हणून ते बोलत होते. या वेळी कृषिमंत्री धनंजय मुंडे, आमदार किशोर जोरगेवार, म. रा. खादी ग्रामोद्योग मंडळाचे सभापती रविंद्र साठे, जिल्हाधिकारी विनय गौडा, मुख्य कार्यकारी अधिकारी विवेक जॉन्सन, बांबू बोर्डाचे अध्यक्ष श्रीनिवास राव, ताडोबाचे क्षेत्रीय संचालक जितेंद्र रामगावकर आदी उपस्थित होते.

मुनगंटीवार म्हणाले, ‘‘चंद्रपूर जिल्ह्यात आता तांत्रिक शेती, बांबू शेती, वनशेती, रानभाजी शेती असे उपक्रम राबविण्यात येतील. जंगल क्षेत्र असलेल्या गावातील शेतकऱ्यांना राज्य सरकारकडून ९० टक्के अनुदानावर कुंपन देण्याचा निर्णय घेण्यात आला.’’

एमआयडीसीच्या धर्तीवर आता एफआयडीसीची निर्मिती होईल. लाकडावर कोरीव काम करणाऱ्यांसाठी ४८ कोटी रुपये खर्च करून फर्निचर क्लस्टर तयार करण्यात येत आहे.

मधाच्या दोन गावांची निवड

चंद्रपूर जिल्हा वाघ, साग, चिमूर क्रांती, कोळसा, वन मधासाठी प्रसिद्ध आहे. आता पिर्ली आणि मामला या दोन गावांची मधाचे गाव म्हणून निवड झाल्यामुळे चंद्रपूर जिल्हा हनी क्रांतीचा महत्त्वाचा भाग होईल.