Nagpur News : पशू चिकित्सा सेवा, अभ्यासक्रमासह विविध बाबींचे नियमन करणाऱ्या भारतीय पशुवैद्यक परिषदेच्या (व्हीसीआय) निवडणुकीत इंडियन व्हेटरनरी असोसिएशनच्या (आयव्हीए) पॅनेलने बाजी मारली आहे. या पॅनेलचे सर्व ११ सदस्य निवडून आले. त्यामध्ये अमरावती जिल्ह्यातील डॉ. संदीप इंगळे यांचाही समावेश आहे.
पशुवैद्यक अभ्यासक्रमासह पशुचिकित्सा व इतर सेवांचे नियमन करण्याचे काम पशुवैद्यक परिषदेच्या माध्यमातून होते. त्यामुळेच भारतीय पशुवैद्यक परिषदेला विशेष महत्त्व आहे. या परिषदेत तब्बल २७ सदस्यांची नेमणूक केली जाते. त्यातील ११ सदस्य हे पशुविज्ञान क्षेत्रातील देशभरातील तज्ज्ञांच्या माध्यमातून निवडले जातात.
अशा मतदारांची संख्या ६९ हजार इतकी आहे. पाच कुलगुरू, केंद्रीय संशोधन संस्थांवरील चार संचालक, भारतीय कृषी संशोधन परिषदेचे एक उपमहासंचालक, १ आयुक्‍त, भारत सरकारचे तीन माजी वरिष्ठ अधिकारी याप्रमाणे २७ जणांचा परिषदेवर समावेश राहतो.
दरम्यान, यावर्षी देशभरातून तब्बल ९२ व्यक्‍तींनी परिषद सदस्यासाठी निवडणूक लढविली. त्यामध्ये ‘आयव्हीए’ या पॅनेलच्या ११ सदस्यांचाही समावेश होता. यावर्षी ६९ हजार पैकी ३६ हजार मतदारांनी ऑनलाइन पद्धतीने मतदान केले. त्यामध्ये ‘आयव्हीए’च्या पॅनेलचे सर्व ११ सदस्य विजयी ठरले आहेत.
अमरावती येथील मुळचे असलेले डॉ. संदीप इंगळे हे ‘आयव्हीए’च्या पॅनेलद्वारे चौथ्यांदा परिषदेवर निवडून गेले आहेत. डॉ. इंगळे हे महाराष्ट्र पशू व मत्स्य विज्ञान विद्यापीठाच्या कार्यकारी परिषदेचे संचालक देखील आहेत. उर्वरित सदस्यांमध्ये डॉ. उमेशचंद्र शर्मा, डॉ. इंद्रजित सिंग, डॉ. थंनीगावेल्लू डी., डॉ.दांडेश्‍वर डेका, डॉ. गुरुचरण दत्ता, डॉ. किरण वासवा, डॉ. सुशांथ राय बी., डॉ. गीता प्रिया एल., डॉ. विजय कुमार, डॉ. अमित नैन यांचा समावेश आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.