Water Storage : वरखेडे प्रकल्पात जलसंचय होण्याची अपेक्षा

Jalgaon News : गिरणा पट्ट्यात चाळीसगाव, भडगाव आदी भागासाठी लाभदायी ठरणाऱ्या गिरणा नदीवरील वरखेडे लोंढे बॅरेज किंवा मध्यम प्रकल्पात यंदाही जलसंचय झालेला नाही. परंतु या प्रकल्पासाठी आवश्यक भूसंपादनास यंदा गती येत असल्याचे दिसत असून, बंदीस्त जलवाहिनीचे कामही गतीने सुरू आहे.

या वर्षी काम ९५ टक्के पूर्ण झाले आहे. त्यात यंदा १०० टक्के जलसाठा असेल, असा दावा या वर्षाच्या सुरवातीला केला जात होता. पण यंदाही त्यात जलसंचय करण्यात आलेला नाही. कारण त्यासंबंधी भूसंपादनाच्या कामास गती द्यायची आहे.

वरखेडे लोंढे बॅरेजचे काम गेल्या सरकारने वेगात केले. पण या प्रकल्पाच्या कालव्यांचा मुद्दा अपूर्ण राहीला. हा तिढा बऱ्यापैकी दूर झाला आहे. यंदा किंवा निवडणुकीनंतर या कामास सुरवात झाली आहे. सध्या उंबरखेड व परिसरात जलवाहिनीचे काम सुरू आहे. सुमारे 360 कोटी रुपये निधी त्यासाठी शासनाने दिला आहे.

कालवा बंदीस्त करावा, जलवाहिनीद्वारे शेतात पाणी पोचवावे, अशी मागणी शेतकरी, स्थानिक लोकप्रतिनिधींनी करीत होते. प्रकल्पाचे काम बऱ्यापैकी झाले. त्यात यंदा जलसंचय झाला असता तर परिसरातील शेतीस उपयोग होण्यास मदत झाली असती. जाईल व त्याचा उपयोग किमान नदीकाठच्या किंवा प्रकल्पानजीकच्या भागातील क्षेत्रात पुनर्भरणासाठी होईल, असे संकेत होते.

पण १०० टक्के जलसाठा होवू शकला नाही. पण यंदा किंवा पुढे ऑक्टोबर, नोव्हेंबरमध्ये या प्रकल्पात जलसंचय होईल, अशी स्थिती आहे. प्रकल्पात १०० टक्के जलसंचय करण्यासाठी भूसंपादनाची गरज आहे. त्यासंबंधी प्रशासनाने कार्यवाही पुढे रेटल्याची माहिती आहे.

अडीच हजार हेक्टरला लाभ

परिसरातील सुमारे अडीच हजार हेक्टरला लाभ होणार आहे. चाळीसगाव, भडगावचा परिसर पूर्वी ऊस शेतीत अग्रेसर होता. ऊस, भाजीपाला, केळीची शेती या प्रकल्पामुळेवाढणार आहे.

साखर कारखानादेखील चाळीसगावात भोरसमध्ये आहे. हा कारखाना सुरू झाल्यास आणखी लाभ शेतकऱ्यांना होवू शकले. या प्रकल्पाचा लाभ भडगावलादेखील होवू शकतो. लोकप्रतिनिधी व प्रशासनाने यासंबंधी कार्यवाही हाती घेतलेली असतानाच जळगाव जिल्ह्यात गिरीश महाजन यांच्या रूपाने जलसंपदामंत्रीपदही मिळाले आहे. यामुळेदेखील हा प्रकल्प यंदा 100 टक्के पूर्ण होऊन त्यात जलसाठा होईल, असेही संकेत आहेत.