Turmeric Farming : मंगरूळ येथे हळद उत्पादन वाढ तंत्र प्रात्यक्षिक प्रक्षेत्र दिन

Parbhani News : परभणी कृषी विज्ञान केंद्रातर्फे मंगरुळ (ता. मानवत) येथे मंगळवारी (ता. १५) हळद उत्पादन वाढीसाठी सूक्ष्म मूलद्रव्यांचा वापर प्रात्यक्षिक प्रक्षेत्र दिनाचे आयोजन करण्यात आले होते.

कृषी विज्ञान केंद्राचे वरिष्ठ शास्त्रज्ञ व प्रमुख डॉ. प्रशांत भोसले यांच्या मार्गदर्शनात कृषी विज्ञान केंद्र मार्फत तंत्रज्ञानाचा प्रसार व प्रचार करण्याच्या दृष्टीने हळद पिकातील उत्पादन वाढीसाठी भारतीय कृषी संशोधन परिषद अंतर्गत केरळ मधील कालिकत येथील मसाला वर्गीय संशोधन केंद्रामार्फत तयार करण्यात आलेले सूक्ष्म मुलद्रव्याचा वापर याबाबतचे आद्यरेषा पीक प्रात्यक्षिक शेतकऱ्यांच्या शेतावर घेण्यात आले.

या आद्यरेषा पीक प्रात्यक्षिकामध्ये मसाला वर्गीय संशोधन केंद्रामार्फत तयार करण्यात आलेले सूक्ष्म मुलद्रव्याचा हळदीच्या लागवडीनंतर ६० व ९० दिवसांनी वापर करण्यात आला. यामुळे वाढ चांगल्या प्रकारे होऊन पिकाचा पिवळेपणा कमी झाला.

यावेळी निविष्ठांचा प्रत्यक्षात वापर केलेल्या शेतकऱ्यांनी हळद उत्पादनात १५ ते २० टक्के वाढ होईल सांगितले. मंगरुळ येथील प्रगतशील शेतकरी अशोक देशमाने यांनी या तंत्रज्ञानाच्या वापरामुळे या वर्षी त्यांना एकरी ४० क्विंटल हळदीचे उत्पादन येईल अशी अपेक्षा व्यक्त केली.

तांत्रिक सत्रामध्ये कृषी विज्ञान केंद्राचे शास्त्रज्ञ अमित तुपे यांनी या तंत्रज्ञानाचे महत्त्व विशद केले. शेतकऱ्यांनी या सूक्ष्म मुलद्रव्याचा आले व हळद या दोनही पिकात वापर करावा असे आवाहन केले.पुढील वर्षीच्या हंगामामध्ये जास्तीत जास्त शेतकऱ्यांनी याचा वापर करावा, अशी अपेक्षा व्यक्त केली.