Kharif Contest: ‘तिफन’तर्फे खरीप हंगामासाठी ‘माझा शेती संकल्प स्पर्धा’

Pune News: खरीप हंगामासाठी तिफन फाउंडेशनतर्फे आयोजित ‘माझा शेती संकल्प स्पर्धा २०२५’ या अभिनव उपक्रमाचे उद्‌घाटन कृषी आयुक्त सूरज पांढरे यांच्या हस्ते नुकतेच झाले.

कार्यक्रमास कृषी निविष्ठा व गुणनियंत्रण संचालक सुनील बोरकर, कृषी विस्तार व प्रशिक्षण संचालक रफिक नायकवडी, कृषी संचालक आत्मा अशोक किरनळ्ळी, फलोत्पादन कृषी संचालक कैलास मोते आदी मान्यवर उपस्थित होते. याप्रसंगी बोलताना आयुक्त श्री. पांढरे म्हणाले, “शेतकऱ्यांपर्यंत कृषी तंत्रज्ञान पोहोचविण्यासाठी विविध माध्यमांचा वापर होणे गरजेचे आहे. ही स्पर्धा त्यासाठी प्रभावी ठरेल. योग्य, व्यवहार्य आणि चुकीच्या शेती संकल्पांबद्दल स्पष्ट माहिती देण्यात यावी.”

फाउंडेशन सातत्याने विविध प्रकारचे उपक्रम राबवीत असते. या स्पर्धेची माहिती देताना फाउंडेशनचे सुखदेव जमधडे म्हणाले, “माती परीक्षण, बीज प्रक्रिया, चांगल्या वाणांची निवड, बायोचार निर्मिती व वापर, कंपोस्टिंग व सेंद्रिय खतनिर्मिती या विषयांवर शेतकऱ्यांमध्ये जागरूकता निर्माण करणे, परस्पर शिकण्याची संस्कृती वाढवणे हेच या स्पर्धेचे मुख्य उद्दिष्ट आहे. ही स्पर्धा महाराष्ट्रातील सर्व शेतकऱ्यांसाठी खुली असून नोंदणी पूर्णतः मोफत आहे.”

नोंदणीसाठी ग्रामसेतू या अ‍ॅपचा वापर करावा लागेल. शेतकऱ्यांना स्पर्धेतील वेगवेगळ्या टप्प्यानुसार गुण मिळणार आहेत. शेतकऱ्यांची क्षेत्रीय पाहणी करण्यात येणार आहे. स्पर्धा यशस्वितेसाठी अंजना सोनवलकर, नीलेश बिबवे, महेश बोरुडे, दत्तात्रेय बुचकुल, प्रदीप भोर, राजेंद्र कदम, श्रीधर बेलसरे, संतोष पाटील, यशवंत गव्हाणे, भुजंग लोकरे, मनोज गायधने, रामहारी फटांगरे हे प्रयत्नशील होते.

स्पर्धेची माहिती :

कालावधी : १८ एप्रिल २०२५ ते १५ जून २०२५

निकाल जाहीर होण्याची तारीख: १५ जुलै २०२५

सादरीकरण : ऑनलाइन (ग्रामसेतू ॲप)

पोस्ट प्रकार : संकल्प + प्रत्यक्ष कृती (फोटो, व्हिडिओ, मजकूर)

विजेते प्रकार : या स्पर्धेत राज्य व जिल्हास्तरावर तीन अनुक्रमे विजेते निवडले जाणार आहेत. मोठ्या क्षेत्रफळाच्या जिल्ह्यांमध्ये प्रथम तीन क्रमांकाचे प्रत्येकी २ विजेते निवडले जातील.

राज्यस्तरीय पारितोषिके :

प्रथम : १० हजार रुपये

द्वितीय : ७ हजार रुपये

तृतीय : ५ हजार रुपये

जिल्हास्तरीय विजेत्यांना : सन्मान चिन्ह व प्रमाणपत्र