Agriculture Sowing : पाऊस लांबला, पेरण्या खोळंबल्या

Chandrapur News : जून महिना संपत आला तरी अजूनही पुरेसा पाऊस जिल्ह्यात झाला नाही. २६ दिवसांत केवळ ७३.२० मिमी पावसाची नोंद जिल्ह्यात झाली. अजूनही समाधानकारक पाऊस झाला नसल्याने पेरण्या खोळंबल्या आहेत.आतापर्यंत २४ टक्केच पेरण्या आटोपल्या. जिल्ह्याचे खरिपाचे क्षेत्र ४ लाख ५८ हजार ७२९ हेक्टर इतके आहे. त्यापैकी एक लाख १० हजार ८५२ हेक्टर क्षेत्रावर पेरणी झाली.

जिल्ह्याचे खरीप हंगामाचे सरासरी क्षेत्र ४ लाख ५८ हजार ७२९ हेक्टर इतके आहे. जिल्ह्यात प्रामुख्याने धानाचे पीक मोठ्या प्रमाणावर घेतल्या जाते. मूल ते ब्रह्मपुरीपर्यंतचा भाग धानपट्ट्याचा भाग म्हणून ओळखला जातो. धानाचे एकूण क्षेत्र एक लाख ८५ हजार हेक्टर आहे. धानाला जास्त पावसाची आवश्यकता भासते.मात्र अजूनही पुरेसा पाऊस झाला नाही.

त्यामुळे धानपट्ट्यात पेरण्या खोळंबल्या आहेत. धानाचे पऱ्हे ४ हजार ३१९, तर पेरीव ७ हजार ३६८ हेक्टरवर झाले आहे. धानापाठोपाठ जिल्ह्यात कापूस, सोयाबीन आणि तुरीचे पीकही मोठ्या प्रमाणावर घेतल्या जाते. कापसाचे क्षेत्र एक लाख ९० हजार हेक्टर आहे. कापसाला पाऊस कमी लागतो.

जून महिन्याच्या प्रारंभी जिल्ह्यात थोडाबहुत पाऊस झाला होता. याच पावसाने अनेक शेतकऱ्यांनी कपाशीच्या पेरणी केल्या. सध्या ७५ हजार ३३३ हेक्टर क्षेत्रावर पेरण्या आटोपल्या. सोयाबीनचे क्षेत्र ७० हजार आणि तुरीचे पीक ३४ हजार हेक्टर क्षेत्रावर घेतले जाते.सोयाबीनला पाऊस कमी लागतो.

त्यामुळे जिल्ह्यात १९ हजार ६५१ हजार हेक्टर क्षेत्रावर सध्या सोयाबीनची पेरणी झाली. तुरीची ७ हजार ९६३ हेक्टर क्षेत्रावर लागवड करण्यात आली. जून महिन्याच्या पहिल्या आठवड्यात जिवती, कोरपना, राजुरा, गोंडपिपरी आणि अन्य भागात थोडाबहुत पाऊस झाला. त्यामुळे या भागातील शेतकऱ्यांनी कपाशीची लागवड केली. मात्र, त्यानंतर पावसाने उसंत घेतली. त्यामुळे या भागातील शेतकऱ्यांना दुबारपेरणी करावी लागली. चंद्रपूर जिल्ह्याचे सरासरी पर्जन्यमान एक हजार १४२ मिमी आहे. २६ जूनपर्यंत केवळ ७३.२० मिमी पावसाची नोंद झाली.