Pre Monsoon Rain : मॉन्सूनपूर्व पावसाची पुन्हा दमदार हजेरी

Sindhudurg News : सिंधुदुर्ग जिल्ह्याच्या बहुतांशी भागात सोमवारी (ता. ३) मॉन्सूनपूर्व पावसाने पुन्हा दमदार हजेरी लावली.त्यामुळे संपूर्ण जिल्ह्यातील वातावरण पावसाळी बनले. दरम्यान मंगळवारी (ता. ४) सकाळपासून जिल्ह्यात ढगाळ वातावरण आहे.

जिल्ह्यात ११ मे पासून २४ मे पर्यंत मॉन्सूनपूर्व पावसाने झोडपून काढले. त्यानंतर पावसाने विश्रांती घेतली होती.दरम्यान गेले पाच सहा दिवस जिल्ह्यात उष्णतेची लाटसदृश्य वातावरण होते. उकाड्याने नागरिक हैराण झाले होते. परंतु सोमवारी ढगाळ वातावरण होते. कोणत्याही क्षणी पाऊस पडेल अशी स्थिती होती.

दरम्यान दुपारी एक वाजेपासून जिल्ह्याच्या बहुतांशी भागात मॉन्सूनपूर्व पावसाने पुन्हा दमदार हजेरी लावली. काही भागात किरकोळ गडगडाट झाला. मात्र मॉन्सूनप्रमाणे पावसाच्या सरींचा वर्षाव झाला.

वैभववाडी तालुक्यात सर्वत्र पावसाच्या सरी कोसळल्या काही भागात अर्धा तास पाऊस झाला. कणकवलीत विजांचा गडागडाट झाला. परंतु पावसाच्या हलक्या सरी झाल्या. सावंतवाडी तालुक्याच्या बहुतांशी भागात पावसाळी वातावरण होते. सायकांळी चारच्या सुमारास सर्वत्र पाऊस झाला.

काही भागात रिमझिम पाऊस सुरू होता. किनारपट्टी भागात देखील पावसाचे वातावरण होते. या पावसामुळे काहीसा गारवा निर्माण झाला होता.दरम्यान जिल्ह्यात मंगळवारी सकाळपासून ढगाळ वातावरण आहे. तापमान वाढल्याने उकाडा प्रचंड जाणवत आहे.